فیصل آباد میں بااثر افراد کا کم عمر بچی پر سرعام تشدد ملزم گرفتار

ویڈیو وائرل ہونے پر ملزم کو گرفتار کیا گیا، کم عمر بچی پر تشدد کا مقدمہ تھانہ مدینہ ٹاؤن میں درج (فوٹو : فائل)

---

بااثر افراد نے بے بس اور کمزور بچی کو سرعام تشدد کا نشانہ بنایا جس نے انسانیت کو شرمادیا، ویڈیو وائرل ہونے پر پولیس نے ملزم کو گرفتار کرلیا۔

فیصل آباد کے ایڈن گارڈن کنال روڈ سوسائٹی کے صدر رانا منیر نے بیوی سمیت دو خواتین اور کم عمر بیٹے کے ہمراہ ایک بچی کو سرعام مارا پیٹا لیکن کوئی اسے بچانے آگے نہ آیا۔

تشدد کے دوران بچی کو بالوں سے پکڑ کر گھسیٹا اور پھینکا گیا اور اس کے سر سے دوپٹا بھی نوچ لیا گیا۔ واقعے کی ویڈیو بھی وائرل ہوگئی جس میں کم عمر بچی پر خواتین اور مرد کو تشدد کرتے دیکھا جاسکتا ہے۔



اس واقعے پر پنجاب پولیس اور چائلڈ پروٹیکشن بیورو فوری حرکت میں آگیا اور چائلڈ پروٹیکشن بیورو کی آفیسر ثمینہ نادر کی مدعیت میں ملزمان کے خلاف تھانہ مدینہ ٹاؤن میں مقدمہ درج کرلیا گیا۔

ایس ایچ او تھانہ مدینہ ٹاؤن نے بتایا کہ بچی پر تشدد میں ملوث ملزم کو گرفتار کرلیا گیا ہے۔

فیصل آباد میں امیر فیملی کے بچوں کو پرندوں کو چھیڑنے سے منع کرنے پر گیارہ سالہ گھریلو ملازمہ پر تشدد
بڑے گھروں والے چھوٹے لوگ ۔۔ اپنے بچوں سے بھی غریب ملازمہ پر تشدد کر کے ان کی بھی ویسی ہی تربیت کر رہے جیسی ان کی خود کی اس ویڈیو میں ظاہر ہو رہی ہے @AmnanRajput pic.twitter.com/Sz3IfKrZcq

— Hummad Ahmed (@HummadGeo) December 5, 2020

آئی جی پنجاب انعام غنی نے گھریلو ملازمہ پر تشدد کا نوٹس لیتے ہوئے آر پی او فیصل آباد سے واقعے کی رپورٹ طلب کرلی اور ملزمان کے خلاف بلاتاخیر قانونی کارروائی کا حکم دے دیا۔