لاڑکانہ سے قومی اسمبلی کے حلقہ این اے 204 پر ضمنی انتخابات میں پیپلزپارٹی کی جانب سے بلاول بھٹو زرداری کے مقابلے میں فاطمہ بھٹو کو لائے جانے کا امکان ہے۔
ایکسپریس نیوز کے مطابق پیپلزپارٹی شہید بھٹو کی سربراہ غنویٰ بھٹو لاڑکانہ کے حلقہ این اے 204 پر ضمنی انتخاب میں بلاول بھٹو زرداری کے مقابلے میں فاطمہ بھٹو کو امیدوار لانا چاہتی ہیں ، اس حوالے سے ان کی زیر صدارت پارٹی کا اجلاس ممکنہ طور پر بے نظیر بھٹو کی برسی کے بعد ہو گا جس میں مشاورت کے بعد فاطمہ بھٹو کو الیکشن لڑانے کا حتمی فیصلہ کیا جائے گا۔ ذرائع کے مطابق فاطمہ بھٹو نے سیاست سے کنارہ کشی اختیار کر رکھی ہے تاہم بلاول بھٹو زرداری کا مقابلہ کرنے لئے غنوی بھٹو انہیں ضمنی انتخاب میں امیدوار لانا چاہتی ہیں۔
واضح رہے کہ لاڑکانہ کی نشست این اے 204 پر پیپلزپارٹی کے امیدوار ایاز سومرو نے عام انتخابات میں کامیابی حاصل کی تھی، ایاز سومرو کے استعفی کے بعد اس نشست پر بلاول بھٹو زرداری ضمنی انتخابات میں حصہ لیں گے۔