حکومت کی لاپتہ شہری کی فیملی کو ماہانہ اخراجات ادا کرنے کی یقین دہانی

ریاست پر سب کا اعتماد ختم ہوجائے تو انارکی پھیلے گی، اسلام آباد ہائی کورٹ

ویب ڈیسک December 07, 2020

ریاست پر سب کا اعتماد ختم ہوجائے تو انارکی پھیلے گی، اسلام آباد ہائی کورٹ

اسلام آباد ہائی کورٹ نے ریمارکس دیے ہیں کہ ریاست پر سب کا اعتماد ختم ہوجائے تو انارکی پھیلے گی۔

ہائی کورٹ میں لاپتہ آئی ٹی ایکسپرٹ ساجد محمود کی بازیابی کے فیصلے پر عمل درآمد نہ ہونے پر توہین عدالت کیس کی سماعت ہوئی۔ وزارت داخلہ نے مسنگ پرسن کی فیملی کو ساٹھ روز کے اندر ماہانہ اخراجات دینے کی یقین دہانی کرائی۔

اسلام آباد ہائی کورٹ نے وزارت داخلہ کی یقین دہانی کے بعد توہین عدالت کی درخواست نمٹاتے ہوئے پولیس کو لاپتہ ساجد محمود کی بازیابی کے لیے ہر دو ہفتے بعد رپورٹ جمع کرانے کی ہدایت کی۔

وکیل درخواست گزار عمر گیلانی نے کہا کہ ہم صرف عدالت کے فیصلے پر عملدرآمد چاہتے ہیں۔ جسٹس اطہر من اللہ نے ریمارکس دیے کہ فیصلہ دینے کے علاوہ عدالت کیا کرسکتی ہے؟ ریاست کہتی ہے ہم شہری کو تلاش نہیں کر پارہے، اب عدالت خود تو جاکر ڈھونڈ نہیں سکتی، عدالت کی کچھ حدود ہیں کیونکہ ہم کچھ باتیں صرف فرض نہیں کرسکتے، ریاست پر سب کا اعتماد ختم ہوجائے تو پھر تو انارکی پھیلے گی۔