اگلے الیکشن میں ووٹ اس پارٹی کو دوں گا جو کراچی صاف کرے گا شہزاد رائے

مطلب یہ ہوا کہ میں آئندہ انتخابات میں ووٹ ہی نہیں دوں گا، گلوکاروسماجی کارکن

---

گلوکار شہزاد رائے کا کہنا ہے کہ میں آئندہ انتخابات میں اس جماعت کو ووٹ دوں گا جو کراچی کو صاف کرے گا۔

کراچی کی صفائی پر شروع دن سے سیاست ہوتی آئی ہے اور اس میں تحریک انصاف، ایم کیو ایم اور پیپلزپارٹی کی جماعتیں پیش پیش رہی ہیں، وفاقی وزیر علی زیدی نے کلین کراچی کے نام سے مہم بھی شروع کی جس میں 90 روز میں شہر قائد کو صاف کرنے کا دعویٰ کیا گیا لیکن وہ مہم بے سود رہی۔

ایم کیو ایم کے سابق میئر وسیم اختر صفائی کو لے کر ہمیشہ اختیارات کا رونا روتے ہوئے دکھائی دیے کہ ''میرے پاس نہ فنڈز ہیں اور نہ ہی مشینری''، اس لیے کام نہیں کرسکتا جب کہ وزیراعلیٰ سندھ مراد علی شاہ نے بھی کراچی کی صفائی کے حوالے سے بڑے بڑے دعوے کر رکھے ہیں لیکن کراچی میں اب بھی جگہ جگہ گندگی کے ڈھیر دکھائی دیتے ہیں۔

دوسری جانب یہ جماعتیں کراچی میں نالوں پر قائم تجاوزات کو گندگی کی وجہ قرار دیتی ہیں جس کے لیے سپریم کورٹ نے کراچی کے تمام بڑے نالوں کی صفائی کے ساتھ ساتھ اس پر قائم تجاوزات کو ہٹانے کا حکم دیا لیکن صوبائی حکومت نے اب تک اس پر بھی عمل نہیں کیا۔

اس خبر کو بھی پڑھیں؛ وسیم اکرم کراچی کے ساحل پر گندگی دیکھ کر برہم

پاکستان کے معروف گلوکار اور سماجی کارکن شہزاد رائے نے اپنی ٹوئٹ میں کہا ہے کہ اگلے انتخابات میں اس جماعت کو ووٹ دوں گا جو کراچی کو صاف کرے گا، اس کا مطلب یہ ہوا کہ میں ووٹ ہی نہیں دوں گا۔

In next elections I will vote for the party who will clean #karachi... that means I will not vote at all

— Shehzad Roy (@ShehzadRoy) December 10, 2020

اس سے قبل ہم نے دیکھا کہ قومی ٹیم کے سابق کپتان وسیم اکرم بھی سوشل میڈیا کے ذریعے کراچی کی صفائی کو لے کر بہت ناگواری کا اظہار کرچکے ہیں اور اس حوالے سے وہ ساحل سمندر پر موجود گندگی کی ویڈیو بناکر بھی شیئر کرچکے ہیں جس پر فوری نوٹس لیتے ہوئے ساحل کو صاف کردیا گیا تھا تاہم شہر قائد کی گندگی ایک بار کی صفائی سے ختم نہیں ہوگی بلکہ اس شہر کی خوبصورتی واپس لوٹانے کے لیے متعلقہ اداروں کو روزانہ کی بنیاد پر کام کرنا ہوگا۔

Finally something positive congratulations 👏 to karachites and CBC special thanks to sarfaraz and his team who work tirelessly everyday. #cleanbeach#happy-days pic.twitter.com/i5fFDt68UC

— Wasim Akram (@wasimakramlive) December 2, 2020