مکالمہ جمہوریت کی روح ہے

وزیراعظم اور اپوزیشن قومی زندگی کے اس نازک موڑ پر صبر و تحمل اور سیاسی بصیرت اور دوراندیشی کا مظاہرہ کریں۔

Editorial December 12, 2020

وزیراعظم اور اپوزیشن قومی زندگی کے اس نازک موڑ پر صبر و تحمل اور سیاسی بصیرت اور دوراندیشی کا مظاہرہ کریں۔ فوٹو: فائل

ZAGREB: اپوزیشن سے بادی النظر میں مکالمہ کرنے کی حکومتی برف ٹوٹنے لگی ہے۔وزیراعظم عمران خان نے اپوزیشن سے اپیل کی ہے کہ وہ دو تین ماہ جلسے ملتوی کر دے، اسپتال بھر چکے ہیں، بزرگ شہریوں کو مشکلات ہونگی۔

گزشتہ دنوں سیالکوٹ میں صحافیوں سے گفتگو کرتے ہوئے انھوں نے کہا کہ سیاسی ڈائیلاگ کی بہترین جگہ پارلیمنٹ ہے۔ اپوزیشن نے تحریک عدم اعتماد لانی ہے تو اسمبلی میں آئے، انھوں نے کہا کہ ہم قومی مکالمہ میں کبھی پیچھے نہیں ہٹے ہیں، پہلے روز سے کہا تھا کہ پارلیمنٹ میں سوالات کے جواب دینے کو تیار ہیں۔جمہوریت تب چلے گی جب مکالمہ ہوگا۔

سیاسی مبصرین کا کہنا ہے کہ وزیر اعظم کی جانب سے مذاکرات کی بات کرنا درست سمت میں ایک خوش آئند اقدام ہے، یہ صائب فیصلہ پہلے کر لیا جاتا تو ملکی سیاست ایک خوشگوار حیرت کے باعث دوطرفہ کشیدگی اور بند گلی میں داخل نہ ہوتی، بہت سی پیچیدگیاں نہ صرف ختم ہوجاتیں، خیر سگالی کا ماحول پیدا ہوتا بلکہ جلسے جلوسوں کی نوبت بھی نہ آتی۔

یہ حقیقت ہے کہ پارلیمینٹ میں اپوزیشن سے مکالمہ کی بات ''آئے کچھ ابر کچھ بہار آئے'' کا سندیسہ لائی ہے، اب وقت بتائے گا کہ وزیر اعظم کے اس انداز فکر کے رد عمل میں اپوزیشن کیا کہتی ہے لیکن حقیقت یہ ہے کہ وزیر اعظم نے سرنگ کے اس پار سیاسی بصیرت کا مظاہرہ کیا ہے ،اپنے دل کی بات کہہ دی ہے، لازم ہے کہ بے یقینی، سیاسی تعطل اور سسٹم کو لاحق خطرات کے سدباب میں مدد ملے، سیاسی درجہ حرارت میں کمی آئے۔

لیکن فہمیدہ حلقوں کا کہنا ہے کہ ان امکانات کے حقیقت کا روپ دھارنے کے لیے پہل بھی وزیراعظم کو کرنا ہوگی، ان کے سیاسی تدبر کا تقاضہ ہے کہ وہ قائد حزب اختلاف شہباز شریف کا پروڈکشن آرڈر جاری کرائیں، اسپیکر قومی اسمبلی اسد قیصر ہدایت دیں.

پی ڈی ایم کی قیادت کو بالمشافہ مکالمہ کی دعوت دیں، ملاقات کا وقت اور مقام طے کیا جا سکتا ہے، وقت کا تقاضہ ہے کہ تمام کام خوش اسلوبی، کشادہ دلی اور قومی بحران کے فی الفور خاتمہ سے مشروط ہو،جمہوری رواداری، ہم آہنگی اور قومی ایشوز پر فیصلہ کن بریک تھرو کا اس سے بہتر وقت پھر نہیں آئے گا۔ اسے درد مند دل رکھنے والی سیاسی جماعتیں یقیناً گڈفیتھ میں لیں گی، نئی تاریخ رقم کی جا سکتی ہے، بیان بازی کی ہسٹیریائی اور ہیجانی کیفیت کا اختتام ہو اور کورونا سے نمٹنے کے لیے جو ماحول درکار ہے اس کے لیے فضا بھی قومی جذبہ کے ساتھ سازگار ہو، مایوسی اور پژمردگی کا خاتمہ ہوسکتا ہے.

مبصرین کے مطابق ملکی سیاست میں تصادم اور تناؤ کی اتنی گھمبیر صورتحال کا ایک ہی حل ہے کہ سیاستدان اور حکمران اپنے اختلافات جمہوری انداز میں حل کریں،نئی روایت ڈالیں، دنیا کو دکھائیں کہ پاکستانی قوم جمہوری روایات سے الگ نہیں، اسے کروڑوں عوام کے مسائل اور ان کی زندگیوں کو کورونا کے مصائب کا سامنا ہے، چیلنجز کثیر جہتی ہیں، مگر نیک نیتی اور جمہوری عمل کی طاقت پر اہل سیاست کا یقین پختہ ہو تو کوئی بھی لمحہ اپنی تاریخ خود بناسکتا ہے، شاید یہی موقع وقت نے اپوزیشن اور حکومت کو دیا ہے۔

اس وقت عوام بلاشبہ شدید اعصابی دباؤ اور غیر یقینی کیفیت کا شکار ہیں مگر سیاسی حلقوں نے وزیر اعظم کی بروقت اپیل کا خیرمقدم کیا ہے،وزیراعظم نے کہا کہ کورونا کی صورتحال کا بحیثیت قوم مقابلہ کرنا ہے، جلسوں سے مجھے خطرہ نہیں بڑھتی ہوئی سردی کے ساتھ کورونا بھی زیادہ پھیلنے کا خدشہ ہے، وزیراعظم نے اپوزیشن سے اپیل کی ہے کہ اس وقت جلسے جلوس کرنے والے عوام کی جانیں خطرے میں ڈال رہے ہیں۔

قومی رابطہ کمیٹی برائے کورونا اجلاس کے بعد گفتگوکرتے ہوئے وزیراعظم نے کہا جلسے جلوسوں سے حکومت کو کوئی فرق نہیں پڑے گا،عوام احتیاطی تدابیر اختیار کریں اور اپنے آپ کو کورونا سے بچائیں۔

وزیراعظم نے کہا کہ شادی ہالز، اسکول اور ریستوران بند کیے ہوئے ہیں، علماء سے بات کی ہے کہ وہ ایک طرف مساجد میں احتیاطی تدابیر اختیار کرنے کو کہتے ہیں تو دوسری طرف جلسے جلوس ہو رہے ہیں۔پہلی لہرمیں ہم نے تو ملک کو لاک ڈاؤن سے بچایا تھا، کورونا کی صورتحال سے ہمارے ڈاکٹرز، نرسوں، بزرگ شہریوں کے لیے مسائل پیدا ہوں گے اور جن لوگوں کو کوئی بیماریاں ہیں ان پر دباؤ بڑھے گا، ان سب چیزوں سے بچنے کے لیے قوم سے اپیل کرتے ہیں کہ احتیاط کریں اور احتیاطی تدابیر پر عمل کریں۔

ضرورت اس بات کی ہے کہ وزیراعظم اور اپوزیشن قومی زندگی کے اس نازک موڑ پر صبر و تحمل اور سیاسی بصیرت اور دوراندیشی کا مظاہرہ کریں۔ قوم کو اسی کا انتظار ہے۔

تبصرے

کا جواب دے رہا ہے۔ X

ایکسپریس میڈیا گروپ اور اس کی پالیسی کا کمنٹس سے متفق ہونا ضروری نہیں۔

مکالمہ جمہوریت کی روح ہے

انٹرٹینمنٹ

"تارک مہتا کا الٹا چشمہ" کے سابق اداکار گرچرن سنگھ کی مشکلات بڑھ گئیں

انڈے اور مونگ پھلی بیچنے والا نوجوان بالی وڈ کا لیجنڈری اداکار کیسے بنا؟

مہارانی یسوبائی کے کردار میں رشمیكا مندانا کا نیا روپ: مداح پرجوش

رائے

بانی پی ٹی آئی… معصوم یا مجرم؟

عجیب منطق

ترقی کے اعداد و شمار یا عوام کے خواب؟

متعلقہ

تازہ ترین

مکالمہ جمہوریت کی روح ہے

ہمارے ساتھ شامل ہوں

مقبول خبریں

انٹرٹینمنٹ

"تارک مہتا کا الٹا چشمہ" کے سابق اداکار گرچرن سنگھ کی مشکلات بڑھ گئیں

انڈے اور مونگ پھلی بیچنے والا نوجوان بالی وڈ کا لیجنڈری اداکار کیسے بنا؟

مہارانی یسوبائی کے کردار میں رشمیكا مندانا کا نیا روپ: مداح پرجوش

رائے

بانی پی ٹی آئی… معصوم یا مجرم؟

عجیب منطق

ترقی کے اعداد و شمار یا عوام کے خواب؟

متعلقہ

تازہ ترین