کراچی میں چینی باشندوں پر بم حملہ ناکام

موٹر سائیکل سوار ملزمان نے چینی شہریوں کی گاڑی پر مقناطیسی بم لگایا جو تکنیکی خرابی کی وجہ سے مکمل نہ پھٹ سکا

---

کلفٹن بلاک 2 میں چینی باشندوں کے خلاف دہشت گردی کی کارروائی ناکام بنادی گئی۔

کراچی میں بلاول ہاؤس چورنگی کے قریب موٹر سائیکل سوار ملزمان نے چینی شہریوں کی گاڑی پر مقناطیسی بم چسپاں کیا، تاہم گاڑی میں موجود غیر ملکی شہریوں نے خطرے کو بھانپتے ہوئے فورا گاڑی ایک طرف کھڑی کرکے پولس کو اطلاع دی۔

پولیس نے فوری پہنچ کر چینی عملے کو محفوظ کیا اور بم ڈسپوزل اسکواڈ کو طلب کیا۔ بی ڈی یو نے موقع پر پہنچ کر بم ڈیوائس کو مہارت کے ساتھ ناکارہ بنادیا۔

ایس ایس پی ساؤتھ زبیر نذیرشیخ کے مطابق گاڑی چینی ریسٹورینٹ کی ملکیت ہے، کار میں ریسٹورینٹ کا چینی عملہ سوار تھا جس کے بروقت اطلاع دینے سے دہشت گردی کی بڑی کارروائی ناکام بنا دی گئی۔

پولیس نے بم کے بارے میں بتایا کہ ریموٹ کنٹرول میگنیٹک ڈیوائس تھی جسے چلتی ہوئی گاڑی پر چپکایا گیا تھا اور ڈیوائس میں ایک کلو سے زائد سیاہ رنگ کا بارودی مواد موجود تھا۔



بی ڈی یو حکام نے بم کی جانچ پڑتال کے بعد واقعے کی تفصیلات سے آگاہ کیا کہ ملزمان نے گاڑی سے دور جاکر سسٹم ایکٹیویٹ کردیا تھا، ڈیوائس میں موجود ڈیٹونیٹر معمول دھماکے سے پھٹا لیکن تکنیکی خرابی کی وجہ سے ڈیوائس مکمل طور پر نہ پھٹ سکی تھی۔

کراچی کلفٹن بلاول ہاوس کے قریب غیر ملکی باشندے کی گاڑی میں
موٹر سائیکل سوار نامعلوم افراد میگنیٹ ٹائپ چیز چپکا کر فرار
علاقے کو سیل کرکے بم ڈسپوزل اسکواڈ کی ٹیم نے ڈیوائس گاڑی سے اتاری مزید تفتیش جاری#Karachi #Clifton #BilawalBhutto @BBhuttoZardari @MediaCellPPP pic.twitter.com/MmMplu5bha

— Malik Ali Raza (@MalikAliiRaza) December 15, 2020