اروند کیجری وال نے دہلی کے وزیراعلیٰ کے عہدے کا حلف اٹھا لیا

مسائل کے حل کے لئے کوئی جادو کی چھڑی نہیں ہے لیکن مل کر اور پختہ عزائم کے ذریعے ملک کو خوشحال بنائیں گے۔ فوٹو : فائل

---

بھارت کی حال ہی میں ریاستی انتخابات جیتنے والی عام آدمی پارٹی کے سربراہ اروند کیجری وال نے دہلی کے ساتویں وزیراعلیٰ کی حیثیت سے حلف اٹھا لیا ہے۔

بھارتی میڈیا رپورٹس کے مطابق بدعنوانی کے خلاف جدو جہد کرنے والے اروند کیجری وال نے ساتویں وزیراعلیٰ کی حیثیت سے رام لیلا میدان میں ہزاروں افراد کی موجود گی میں حلف اٹھایا، حلف برداری کی تقریب میں کسی بھی اعلیٰ شخصیت کو باقاعدہ طور پر مدعو نہیں کیا گیا تھا۔

حلف اٹھانے کے بعد کیجری وال کا کہنا تھا کہ وہ وزیر اعلیٰ کی حیثیت سے اپنے فرائض ایمانداری اور بلا خوف و تعصب انجام دیں گے، دہلی کے ڈیرھ کروڑ شہری آپس میں مل جائیں کیوں کہ ہم سب نے ہی مل کر ملک سے کرپشن کی جڑوں کو نکال کر باہر پھینکنا ہے۔ ان کا کہنا تھا کہ ہمارے پاس مسائل کے حل کے لئے کوئی جادو کی چھڑی نہیں ہے لیکن پختہ عزائم کے ذریعے ملک کو خوشحال بنائیں گے اور آئندہ 5 سالوں میں بھارت سونے کی چڑیا بن جائے گا۔

واضح رہے کہ اروند کیجری وال کی سیاسی جماعت''عام آدمی پارٹی'' نے حالیہ ریاستی انتخابات میں حیرت انگیز کامیابی حاصل کی تھی۔