آواران میں سیکیورٹی فورسز کی کارروائی میں 10 دہشت گرد ہلاک آئی ایس پی آر

دہشت گردوں کے ٹھکانے پر گزشتہ روز لانس نائیک اقبال کو شہید کرنے والے مطلوب دہشت گرد موجود تھے، آئی ایس پی آر

ویب ڈیسک December 22, 2020

دہشت گردوں کے ٹھکانے پر لانس نائیک اقبال کو شہید کرنے والے مطلوب دہشت گرد موجود تھے، آئی ایس پی آر فوٹو : فائل

آئی ایس پی آر کے مطابق آواران میں خفیہ اطلاع پر آپریشن کے دوران 10 دہشت گرد مارے گئے۔

پاک فوج کے شعبہ تعلقات عامہ (آئی ایس پی آر) کے مطابق سیکیورٹی فورسز نے بلوچستان کے علاقے آواران میں خفیہ اطلاعات پر آپریشن کیا جس پر وہاں موجود دہشت گردوں نے فرار ہونے کے لیے سیکیورٹی فورسز پر شدید فائرنگ کی تاہم جوابی کارروائی میں 10 دہشت گرد مارے گئے۔

آئی ایس پی آر کے مطابق دہشت گردوں کے ٹھکانے پر گزشتہ روز لانس نائیک اقبال کو شہید کرنے والے مطلوب دہشت گرد موجود تھے جب کہ ان کے قبضے سے بھاری مقدار میں اسلحہ اور آلات مواصلات بھی برآمد کرلیے گئے ہیں۔

اس خبر کو بھی پڑھیں : آواران میں آپریشن کے دوران لانس نائیک شہید

واضح رہے کہ گزشتہ روز سیکیورٹی فورسز کے اہل کاروں نے آواران کے جٹ بازار میں دہشت گردوں و سہولت کاروں کی موجودگی کی اطلاع پر آپریشن کیا۔ اس دوران سیکیورٹی فورسز و دہشت گردوں کے مابین فائرنگ کا تبادلہ ہوا جس کے نتیجے میں لانس نائیک محمد اقبال شہید ہوگئے تھے۔