بلوچستان کے علاقے ہرنائی میں ایف سی چیک پوسٹ پر حملے میں 7 اہلکار شہید

بزدلانہ کارروائی کرنے والے دہشت گردوں کو بلوچستان کا امن تباہ  کرنے نہیں دیں گے، ترجمان پاک فوج

---

دہشت گردوں نے بلوچستان کے علاقے ہرنائی میں ایف سی کی چیک پوسٹ پر حملہ کیا جس کے نتیجے میں 7 اہلکار فائرنگ کے تبادلے میں شہید ہوگئے۔

پاک فوج کے شعبہ تعلقات عامہ (آئی ایس پی آر) کے مطابق بلوچستان کے علاقے ہرنائی میں ایف سی چیک پوسٹ پر گزشتہ رات حملہ کیا گیا جس کے بعد دہشت گردوں سے فائرنگ کے تبادلے میں ایف سی کے 7 جوان شہید ہوگئے۔

دہشتگردوں کے حملے میں شہید ہونے والوں میں نائب صوبیدار گلزار، سپاہی فیصل، عبدالوکیل ، سپاہی شیر زمان، جمال ، عبدالرؤف اور فقیر محمد شامل ہیں۔

...to apprehend fleeing miscreants. A large scale search and clearance operation is in progress. Such cowardly acts by inimical elements backed by anti state forces will not be allowed to sabotage hard earned peace and prosperity in Balochistan. (2/3)

— DG ISPR (@OfficialDGISPR) December 27, 2020

ترجمان پاک فوج کا کہنا تھا کہ سیکیورٹی فورسز نے دہشت گردوں کو پکڑنے کیلئے علاقے کا محاصرہ کرلیا ہے اور آپریشن کے دوران بھاری تعداد میں اسلحہ اور گولیاں تحویل میں لے لی گئی ہیں جب کہ دہشت گردوں کو فرار سے روکنے کے لیے سرچ آپریشن جاری ہے۔

آئی ایس پی آر کے مطابق دہشت گرد ریاست مخالف قوتوں کی پشت پناہی سے امن کو سبوتاژ کرنے کیلئے یہ بزدلانہ کارروائیاں کررہے ہیں تاہم دہشت گردوں کو بلوچستان میں سخت کوششوں کے بعد حاصل کئے گئے امن کو سبوتاژ نہیں کرنے دیں گے اور سکیورٹی فورسز دشمن کی ہر سازش کو ناکام بنادیں گیں۔

Saddened to hear of 7 brave soldiers martyrdom as a result of terrorist attack on FC post in Harnai Balochistan late last night. My heartfelt condolences & prayers go to their families. Our nation stands with our courageous soldiers who face attacks from Indian backed terrorists.

— Imran Khan (@ImranKhanPTI) December 27, 2020

وزیراعظم عمران خان نے جوانوں کی شہادت پر افسوس کا اظہار کرتے ہوئے کہا کہ ایف سی چوکی پر دہشت گردوں کے حملے کے نتیجے میں 7 بہادر فوجیوں کی شہادت سن کر افسوس ہوا، ہماری قوم ہمارے بہادر فوجیوں کے ساتھ کھڑی ہے جو بھارتی حمایت یافتہ دہشت گردوں کے حملوں کا ڈٹ کر مقابلہ کرتے ہیں، میں شہید ہونے والے بہادر جوانوں کے اہل خانہ سے دلی تعزیت اور دعا کرتا ہوں۔

وزیرداخلہ شیخ رشید نے دہشت گردوں کے حملے میں ایف سی اہلکاروں کی شہادت پر افسوس کا اظہار کیا۔ شیخ رشید کا کہنا تھا کہ ایف سی کے شہید جوانوں کا خون رائیگاں نہیں جائے گا، دہشت گردوں کا خاتمہ ہوگا، دہشت گرد بزدلانہ کارروائیوں سے ہماری فورسزکے حوصلے پست نہیں کرسکتے۔

وزیراعلیٰ بلوچستان جام کمال نے ایف سی چیک پوسٹ پر دہشتگردوں کے حملے پر گہرے دکھ اور افسوس کا اظہار کرتے ہوئے کہا کہ ان حملوں سے ہمارے حوصلے پست نہیں ہوسکتے۔