تحریک انصاف نے ضمنی انتخابات میں جی ڈی اے سے حمایت مانگ لی

تحریک انصاف اور ف لیگ کے رہنماؤں کی اہم ملاقات، پی ٹی آئی نے ملیر اور سانگھڑ کی نشستوں پر حمایت مانگی

Staff Reporter January 02, 2021

سندھ میں عوام پرظلم ہو رہا ہے، فردوس شمیم، ایم کیو ایم بھی ضمنی انتخابات پر مضبوط موقف رکھے، سردار رحیم فوٹو: فائل

پاکستان تحریک انصاف اور فنکشنل لیگ کے رہنماؤں کی اہم ملاقات ہوئی جس میں فنکشنل نے اپنے خدشات سے پی ٹی آئی کے وفد کو آگاہی دے دی۔

تحریک انصاف نے ملیر اور سانگھڑ کی نشستوں پر حمایت مانگ لی، ملاقات میں فنکشنل لیگ سندہ کے جنرل سیکریٹری اور جی ڈی اے کے اطلاعات سیکریٹری سردار عبدالرحیم،ایم پی اے نند کمار گوکلانی جبکہ پی ٹی آئی کی جانب سے اپوزیشن لیڈر فردوس شمیم نقوی،ایم پی اے حلیم عادل شیخ،خرم شیر زمان اور دیگر شامل تھے۔

ملاقات کے بعد میڈیا کو بریفنگ دیتے ہوئے سندھ اسمبلی میں اپوزیشن لیڈر فردوس شمیم نقوی نے کہا کہ سندھ میں 13سالوں سے عوام پر جو ظلم ہورہا ہے اس کے خاتمے لانے کیلیے تمام جماعتوں کو آگے آنا ہوگا،سندہ میں تین نشستوں پر ضمنی انتخابات ہورہے ہیں ،جہاں جس جماعت کا مضبوط امیدوار ہوگا اس کو سپورٹ کی جائے گی،ہم پیر پگارا کے احسان مند ہیں جب سے وہ وفاق میں ہمارے اتحادی بنیں ہے ہر مشکل وقت میں انھوں نے ہمیں مدد دی ہے،ہمیں پوری امید ہے مثبت جواب ملے گا۔

اس موقع پر سردار عبدالرحیم نے کہا اہم میٹنگ تھی،ضمنی انتخابات کے حوالے بات چیت ہوئی عمر کوٹ میں ارباب رحیم جی ڈی اے اور اتحادیوں کے مضبوط امیدوار ہے، میدان خالی نہیں چھوڑنا چاہیے،سانگھڑ اور پی ایس 88 پر ہونے والے ضمنی انتخابات پر بھی اتحاد کی بات ہوئی ہے، ایم کیو ایم سے بھی مطالبہ کروں گا کہ ضمنی انتخابات پر مضبوط مؤقف رکھے۔

انہوں نے کہا کہ ہمیں کہا گیا تھا کہ سندھ میں ترقیاتی کاموں پر جی ڈی کو اعتماد میں لیا جائے گا جو کہ نہیں ہوا،سندھ کے جزائر پر ہمیں سخت خدشات ہیں،پی ٹی آئی نے جزائر پر اپنی غلطی تسلیم کی ہے، وہ آرڈیننس بھی شاید ختم ہوگیا ہے،ایم کیو ایم بھی وفاقی حکومت کی اتحادی ہے وہ بھی مشترکہ امیدوار لانے کہ لیے ساتھ دے۔

ایک سوال کے جواب میں شمیم نقوی نے کہا کہ اتحادیوں کی شکایتیں ختم کی جائیں گے،پی ڈی ایم اتحاد ڈیڈی اور مولانا بچاؤ مہم ہے،پی ڈی ایم صرف استعفیٰ لہرانے کے لیے تھی،وہ بھی ابھی سردی کی وجھ سے لہرا نہیں پارہی،سردار رحیم نے کہا کہ وہ حکمت کا علاج کرواتے ہیں اور ہیلتھ کارڈ پر یقین نہیں کرتے،پی ڈی ایم والے کوئی بیچ کا راستہ نکالیں۔