چین کے مسلم اکثریتی صوبہ سنکیانگ میں پولیس اسٹیشن پر حملہ جھڑپ کے دوران 8 افراد ہلاک

گزشتہ 2 ماہ کے دوران صوبہ سنکیانگ میں اسی نوعیت کی کارروائیوں کے دوران 33 افراد ہلاک ہوچکے ہیں۔ فوٹو: فائل

---

لاہور: چین کے مسلم اکثریتی صوبہ سنکیانگ میں پولیس اسٹیشن پر حملے کے دوران جھڑپ کے نتیجے میں 8 افراد ہلاک ہوگئے ہیں۔

چین کے صوبہ سنکیانگ کی سرکاری ویب سائیٹ پر جاری بیان کے مطابق پیر کی علی الصبح دارالحکومت کاشغر کے قریب واقع یارقند کاؤنٹی میں 9 مسلح افراد نے ایک تھانے پر حملہ کیا۔ حملہ آوروں نے عمارت میں دھماکا خیز مواد پھینکا اور پولیس کی کاروں کو آگ لگادی۔ پولیس کی جوابی کارروائی سے 8 حملہ آور ہلاک ہوگئے جبکہ ایک کو گرفتار کرلیا گیا جس سے تفتیش کی جارہی ہے۔

واضح رہے کہ گزشتہ 2 ماہ کے دوران صوبہ سنکیانگ میں اسی نوعیت کی کارروائیوں کے دوران 33 افراد ہلاک ہوچکے ہیں۔