وزیر اعظم کی ایف بی آرکو انکم ٹیکس سیلز ٹیکس اور دیگر محاصل کی شرح میں کمی کی ہدایت

ایف بی آرمیں اصلاحاتی پیکج متعارف کرایاجاناچاہئے جس سے ٹیکس افسران کی صوابدید کو کم کیا جا سکے، وزیر اعظم فوٹو: فائل۔

---

وزیر اعظم نواز شریف نے ایف بی آر کو انکم ٹیکس، سیلز ٹیکس اور دیگر محاصل کی شرح میں کمی کی ہدایت کردی ہے۔

وزیراعظم ہاﺅس اسلام آباد میں ایف بی آر میں اصلاحات اور ٹیکس دہندگان کو ریلیف فراہم کرنے سے متعلق ایک اجلاس منعقد ہوا جس میں چیرمین فیڈرل بورڈ آف ریونیو اور دیگر حکام نے شرکت کی، اجلاس کے دوران وزیر اعظم نے کہا کہ کرپشن ہمارے تمام مسائل کی بنیادی وجہ ہے یہ ہماری معیشت کو کھا گئی ہے لیکن اب بدعنوانی کو کسی صورت برداشت نہیں کیا جائے گا۔

وزیراعظم نے کہا کہ انکم ٹیکس، سیلز ٹیکس اور دیگر محاصل کی شرح میں کمی اور اداراجاتی کے نظام کو سادہ بنایا جائے تاکہ حکومت کی آمدنی میں اضافہ اور کرپشن میں کمی ہو، ایف بی آر میں ایک جامع اصلاحاتی پیکج متعارف کرایا جانا چاہئے جس سے ٹیکس افسران کی صوابدید کو کم سے کم کیا جاسکے، اس سلسلے میں ایف بی آر ایک ماہ میں اصلاحات کا پیکج لائے۔