کراچی کی سڑکوں پر شتر مرغ کے مٹرگشت کی ویڈیووائرل

شہر کی سڑکوں پر شتر مرغ کی مستی کی ویڈیو سوشل میڈیا پر وائرل ہوگئی۔

ایکسپریس نیوز کے مطابق کراچی کی سڑکوں پر شتر مرغ کے مٹرگشت کی ویڈیو سوشل میڈیا پر وائرل ہوگئی۔ ویڈیو میں واضح طور پر دیکھا جاسکتا ہے کہ ایک شترمرغ سڑک پر بے خوف بھاگتا جارہا ہے، جب کہ قریب سے گزرنے والے مسافر اپنے اپنے موبائل فون سے شتر مرغ کی ویڈیوز بنارہے ہیں۔


پولیس حکام کے مطابق شترمرغ کورنگی ڈھائی نمبر کی روڈ پر بھاگ رہا تھا، جسے موٹر سائیکل سوار شہری پکڑنے کی کوشش کررہے تھے، لیکن شتر مرغ کافی دیر تک شہریوں کو چکما دیتا رہا، تاہم شہریوں نے شتر مرغ کو پکڑ کر انتظامیہ کے حوالے کردیا۔