فواد چوہدری اورمفتی پوپلزئی کو ساتھ لے کر چلیں گے چیئرمین رویت ہلال کمیٹی

ایک دن روزہ اور ایک دن عید قوم کو متحد کرنے کی کوشش کی جائے گی، جمادی الثانی کے چاند کا اعلان کرنے کے موقعے پر گفتگو

ویب ڈیسک January 14, 2021

ایک دن روزہ اور ایک دن عید پر پوری قوم کو اکٹھا کرنے کی کوشش کی جائے گی، چیئرمین رویت ہلال کمیٹی مولانا عبدالخبیر آزاد(فوٹو، انٹرنیٹ)

جمادی الثانی کا چاند دیکھنے کے لیے نئے چیئرمین مولانا عبدالخبیر آزاد کی صدارت میں رویت ہلال کمیٹی کا پہلا اجلاس منعقد ہوا۔

مرکزی روئت ہلال کمیٹی اور زونل کمیٹیوں کے اجلاس میں جمادی الثانی کا چاند نظر آنے کا اعلان کردیا گیا۔ اس موقعے پر چیئرمین مرکزی رویت ہلال کمیٹی مولانا عبدالخبیر آزاد نے کہا کہ ایک دن روزہ اور ایک دن عید پر پوری قوم کو اکٹھا کرنے کی کوشش کی جائے گی۔ سائنس سے بھی مدد لیں گے مگر فیصلہ شریعت اور شہادت کی بنیاد پر کریں گے۔ مفتی شہاب الدین اور فواد چوہدری دونوں کو ساتھ لے کر چلیں گے۔

وزارت مذہبی امور میں رویت ہلال کمیٹی کا اجلاس ہوا۔ زونل رویت ہلال کمیٹیوں کے اجلاس بھی متعلقہ شہروں میں ہوئے اجلاس کے گفتگو کرتے ہوئے چیئرمین مرکزی رویت ہلال کمیٹی مولانا عبدالخبیر آزاد نے کہا کہ جمادی الثانی کا چاند نظر آگیا ہے۔ انہوں نے کہا کہ تمام علما و مسالک کو ساتھ لے کر چلیں گے۔سائنسی معلومات اور شرعی شہادتوں پر انحصار کرکے قوم کو ایک عید اور چاند پر متفق کرنے کی کوشش کریں گے۔

ان کا کہنا تھا کہ مفتی شہاب الدین پوپلزئی کے پاس بھی جائیں گے۔فواد چوہدری کے پاس ان کی وزارت میں بھی گیا تھا۔ دونوں کو ساتھ لے کر چلیں گے۔ سپارکو سائنس و ٹیکنالوجی کی فنی مہارت لیں گے مگر فیصلہ شریعت ہر شہادتوں سے کریں گے۔

مرکزی روئت ہلال کمیٹی کے اجلاس پشاور کراچی کوئٹہ لاہور اور اسلام آباد میں کریں گے۔وزیر اعظم عمران خان کی رہنمائی میں مل کر آگے بڑھیں گے۔

واضح رہے کہ گزشتہ ماہ اس منصب پر دودہائیوں تک فائز رہنے والے معروف عالم دین مفتی منیب الرحمان کو تبدیل کردیا گیا جس کے بعد نئے سربراہ کی صدارت میں یہ رویت ہلال کے لیے کمیٹی کا پہلا اجلاس تھا۔