پرویز مشرف کی والدہ انتقال کرگئیں

امکان ہے کہ تدفین دبئی میں ہی ہو تاہم پاکستان میت لانے کا فیصلہ پرویز مشرف ہی کریں گے، پارٹی رہنما ۔ فوٹو : فائل

---

لاہور: سابق صدر پاکستان جنرل (ر) پرویز مشرف کی والدہ زریں مشرف انتقال کرگئیں، ان کی عمر 100 برس تھی۔

اے پی ایم ایل کے مطابق پارٹی سربراہ اور پاکستان کے سابق صدر جنرل (ر) پرویز مشرف کی والدہ دبئی میں انتقال کرگئیں۔ وہ پرویز مشرف کے ساتھ دبئی میں مقیم تھیں، ان کی عمر 100 سال تھی، وہ 1920ء میں لکھنؤ میں پیدا ہوئیں تھیں۔



اے پی ایم ایل کی مرکزی رہنما مہرین ملک نے ایکسپریس سے بات کرتے ہوئے کہا کہ پرویز مشرف بھی علیل ہیں اور دبئی کے نجی اسپتال میں داخل ہیں، انہیں والدہ کے انتقال کی اطلاع دے دی گئی ہے، وہ اس صورتحال میں بہت غم زدہ ہیں۔



مہرین ملک نے کہا کہ پرویز مشرف کی والدہ کی تدفین کا اعلان جلد کیا جائے گا، امکان ہے کہ تدفین دبئی میں ہی ہو تاہم پاکستان میت لانے کا فیصلہ پرویز مشرف ہی کریں گے۔

دریں اثںا خاندانی ذرائع نے کہا ہے کہ پرویز مشرف کی والدہ کی تدفین دبئی میں کی جائے گی، یہ فیصلہ سابق صدر پرویز مشرف نے کیا ہے، ان کی والدہ کی میت پاکستان نہیں لائی جائے گی۔