علیم ڈار کے دل کی مراد پوری ہونے کا وقت قریب

احسن رضا کے ساتھ پہلی بار ہوم گراؤنڈ پر ٹیسٹ میں امپائرنگ کریں گے

Sports Reporter January 17, 2021

احسن رضا کے ساتھ پہلی بار ہوم گراؤنڈ پر ٹیسٹ میں امپائرنگ کریں گے۔ فوٹو: ایکسپریس نیوز

ISLAMABAD: علیم ڈارکے دل کی مراد پوری ہونے کا وقت قریب آ گیا، وہ جنوبی افریقہ سے سیریز میں احسن رضا کے ساتھ پہلی بار ہوم گراؤنڈ پر ٹیسٹ میں امپائرنگ کریں گے۔

پاکستان اور جنوبی افریقہ کے مابین سیریز کیلیے میچ آفیشلز کا اعلان کردیا گیا، علیم ڈار اور احسن رضا پہلی بارہوم گراؤنڈ پر کسی ٹیسٹ میں امپائرنگ کے فرائض انجام دیں گے، میچ ریفری جاوید ملک طویل فارمیٹ میں ڈیبیو کریں گے، ان کے ساتھ دونوں ٹیسٹ میں آصف یعقوب تھرڈ، راشد ریاض فورتھ امپائر ہوں گے۔

پہلے ٹی ٹوئنٹی میں علیم ڈار اور احسن رضا آن فیلڈ، شوزب رضا ٹی وی اور آصف یعقوب فورتھ امپائر ہیں، دوسرے میچ کیلیے شوزب رضا اور آصف یعقوب آن فیلڈ، احسن رضااور راشد ریاض تھرڈ اور فورتھ امپائر ز مقرر کیے گئے ہیں، آخری ٹی ٹوئنٹی کیلیے علیم ڈار اور راشد ریاض آن فیلڈ، احسن رضا اور شوزب رضا تھرڈ اور فورتھ امپائرہوں گے، میچ ریفری جاوید ملک ہی ہوں گے۔

علیم ڈار کا کہنا ہے کہ پاکستان میں ٹیسٹ میچ میں امپائرنگ ایک جذباتی لمحہ ہوگا، 132 میچز میں امپائرنگ کرچکا بالآخر 17 سال بعد اپنے ملک میں یہ موقع مل رہا ہے۔