رواں مالی سال کی پہلی ششماہی کے دوران معاشی اعشاریوں میں کمی کا رجحان سامنے آگیا، برآمدات اور بیرونی سرمایہ کاری میں کمی واقع ہوئی اور مالیاتی خسارہ بڑھ گیا۔
وزارت خزانہ کی رپورٹ کے مطابق گزشتہ سال کی بہ نسبت بیرونی سرمایہ کاری میں 29.8 فیصد کمی آگئی اور اس کا حجم 1 ارب 35 کروڑ ڈالر سے کم ہو کر 95 کروڑ ڈالر رہ گیا۔
دستاویز کے مطابق مالیاتی خسارہ 21 فیصد اضافہ کے ساتھ 8 سو 22 ارب روپے تک پہنچ گیا جبکہ گزشتہ مالی سال اسی عرصہ کے دوران 676 ارب روپے کا مالیاتی خسارہ ریکارڈ ہوا تھا۔
وزارت خزانہ کی رپورٹ کے مطابق زرعی قرضہ جات میں بھی رواں مالی سال کی پہلی ششماہی کے دوران 2.4 کمی ریکارڈ کی گئی اسی طرح سے گزشتہ سال کی بہ نسبت رواں مالی سال جولائی سے دسمبر برآمدات میں 4.8 فیصد کمی ریکارڈ ہوئی۔
رپورٹ کے مطابق گزشتہ سال کی بہ نسبت جولائی سے دسمبر درآمدات 22 ارب ڈالر سے بڑھ کر 23 ارب ڈالر تک پہنچ گئیں۔