کروڑوں روپے کی اراضی ہتھیانے کا منصوبہ ناکام 2 افسر برطرف

ادارہ ترقیات ملیرکی گورننگ باڈی سے منظوری کے بغیر 30 ایکڑ اراضی کینجھر جھیل کوآپریٹو سوسائٹی کوالاٹ کی جا رہی تھی

Staff Reporter February 01, 2021

قیمتی اراضی کی خورد بورد میں ملوث افسران کے گرد گھیرا تنگ، ڈی جی ایم ڈی اے نے ڈائریکٹر اسٹیٹ اور ڈائریکٹر ٹاؤن پلاننگ کو عہدوں سے برطرف کر دیا ۔ فوٹو: فائل

کراچی میں کروڑوں روپے مالیت کی قیمتی اراضی کو کوڑیوں کے مول ٹھکانے لگانے کا منصوبہ ناکام ہوگیا۔

قیمتی اراضی کی خورد بورد میں ملوث افسران کے گرد گھیرا تنگ ہوگیا، صوبائی وزیر بلدیات نے ملیر ڈیولپمنٹ اتھارٹی کی کروڑوں روپے مالیت کی 30 ایکڑ اراضی نجی کوآپریٹو سوسائٹی کو الاٹ کیے جانے کا سختی سے نوٹس لے کر ڈی جی ایم ڈی اے عمران عطاسومرو کو فوری تحقیقات کا حکم دے دیا۔

تفصیلات کے مطابق گورننگ باڈی سے منظوری لیے بغیرنیشنل ہائی وے پر واقع اراضی کینجھر جھیل نامی کوآپریٹو ہاؤسنگ سوسائٹی کو الاٹ کرنے کی تمام تر تیاریاں مکمل کرلی گئی تھیں، ایم ڈی اے افسران کا نیشنل ہائی وے پر کروڑوں روپے کی 30 ایکڑ قیمتی اراضی نجی کوآپریٹو سوسائٹی کے نام پر ٹھکانے لگانے کا کھیل ناکام ہوگیا ذرائع ابلاغ میں کی گئی نشاندہی پر صوبائی وزیر بلدیات ناصر حسین شاہ نے اس کا سختی سے نوٹس لیتے ہوئے ڈائریکٹر جنرل ایم ڈی اے عمران عطا سومرو کو فوری تحقیقات اور کارروائی کی ہدایت کردی۔

ذرائع کا کہنا ہے کہ صوبائی وزیر بلدیات کی ہدایت پر کارروائی کرتے ہوئے ڈائریکٹر جنرل عمران عطا سومرو نے ایم ڈی اے کے ڈائریکٹر اسٹیٹ محمد عرفان اور ڈائریکٹر ٹاؤن پلاننگ شاہد چوہان کو فوری طور پر عہدوں سے برطرف کرکے تحقیقات کی ہدایت کردی ہے جبکہ مذکورہ افسران کے ساتھ ساتھ ایڈیشنل ڈائریکٹر جنرل ناصر خان کیخلاف بھی کارروائی کا امکان ظاہر کیا جا رہا ہے،ذرائع کا کہنا ہے کہ مذکورہ 30 ایکڑ اراضی کی مبینہ خلاف ضابطہ الاٹمنٹ کیلیے ایڈیشنل ڈائریکٹر جنرل ناصر خان نے اہم کردار ادا کیا تھا اور محکمہ جاتی نوٹ شیٹ میں اراضی کی الاٹمنٹ کی منظوری بھی دی تھی۔

واضح رہے کہ نیشنل ہائی وے پر نیو ملیر ہاؤسنگ اسکیم ون کے سیکٹر 12 میں موجود مذکورہ اراضی ایم ڈی اے نے مستقل کی منصوبہ بندی (فیوچر پلاننگ) کیلیے مختص کر رکھی ہے جسے ٹھکانے لگانے کا کام افسران نے برق رفتاری کے ساتھ کرتے ہوئے آخری مراحل تک پہنچا دیا تھا اور سائٹ پلان تک تیار کرلیا گیا تھا۔

تاہم ذرائع ابلاغ کی نشاندہی کے بعد ایم ڈی اے افسران کا قیمتی اراضی ٹھکانے لگانے کا منصوبہ بری طرح ناکام ہو گیا، ذرائع ابلاغ میں نشاندہی کے بعد ایم ڈی اے افسران اور سسٹم مافیا کا تیار کھیل خاک میں مل گیا، ایڈیشنل ڈی جی ناصر خان سمیت دیگر افسران کیخلاف بھی کارروائی کا امکان ہے۔