بھارتی کسانوں کی حمایت میں بولنے پر فواد چوہدری گلوکارہ ریحانہ کے معترف

کنگنا رناوت نے گلوکارہ ریحانہ کو بھارتی کسانوں کی حمایت کرنے پر بیوقوف قرار دیا ہے، فوٹوفائل

---

وزیر سائنس و ٹیکنالوجی فواد چوہدری نے بھارتی کسانوں کی حمایت میں بولنے پر ہالی ووڈ پاپ اسٹار ریحانہ کی تعریف کی ہے۔

بھارت میں کسانوں کے حکومت مخالف احتجاج نے عالمی توجہ حاصل کرلی ہے، یہاں تک کہ ہالی ووڈ پاپ اسٹار ریحانہ نے بھی بھارتی کسانوں کے ساتھ اظہار یکجہتی کرتے ہوئے ان کے حق میں آواز بلند کردی ہے۔ منگل کے روز گلوکارہ ریحانہ نے بھارتی کسانوں کے احتجاج کی ایک خبر ٹوئٹر پر شیئرکراتے ہوئے لکھا کیوں ہم اس کے بارے میں بات نہیں کررہے؟ اس کے ساتھ انہوں نے کسانوں کا احتجاج ہیش ٹیگ بھی استعمال کیا۔

یہ بھی پڑھیں: کنگنا رناوت بھارت میں احتجاجی کسانوں کے خلاف زہر اگلنے لگیں

فواد چوہدری نے ریحانہ کے اس اقدام کی تعریف کرتے ہوئے کہا ہے ''آپ نے دنیا بھر کے تمام کسانوں اور خصوصاً دنیا بھر کے پنجابیوں کو عزت بخشی اوران کے دلوں میں اپنے لیے عزت بنالی ہے۔ آپ نے ظاہر کیا ہے کہ آپ کا دل صحیح جگہ (کسانوں کے ساتھ) ہے۔ آپ کے لیے بہت سارا احترام۔''

You have earned respect of every Farmer of the world and particularly of #Punjabis all around the world you have showed your heart is on the right place.... loads if respect #FarmersProtests #Rehana https://t.co/dXiafhYeau

— Ch Fawad Hussain (@fawadchaudhry) February 3, 2021

واضح رہے کہ گلوکارہ ریحانہ کی جانب سے بھارتی کسانوں کی حمایت کرنا بالی ووڈ اداکارہ کنگنا رناوت کو ذرا بھی پسند نہیں آیا اور انہوں نے ریحانہ کو بیوقوف قرار دیتے ہوئے کہا '' کوئی اس بارے میں اس لیے بات نہیں کررہا کیونکہ یہ کسان نہیں بلکہ دہشت گرد ہیں جو بھارت کو تقسیم کرنے کی کوشش کررہے ہیں تاکہ چین ہماری ٹوٹی ہوئی کمزور قوم پر قبضہ جماسکے اور امریکا کی طرح اسے ایک چینی کالونی بناسکے۔ کنگنا رناوت نے ریحانہ کو بیوقوف کہتے ہوئے کہا ہم تمہاری طرح اپنی قوم نہیں بیچ رہے۔''