سیونگ سرٹیفکیٹس پر منافع کی ادائیگیاں اچانک روکنے پر کراچی چیمبر کی تشویش

سرمایہ کاری پربغیر کسی وجہ کے منافع کی ادائیگیاں روکنے کی شکایات موصول ہوئی ہیں، صدر شارق وہرا

Staff Reporter February 07, 2021

سرمایہ کاری پربغیر کسی وجہ کے منافع کی ادائیگیاں روکنے کی شکایات موصول ہوئی ہیں، صدر شارق وہرا۔ فوٹو: فائل

کراچی چیمبرآف کامرس نے ادارہ قومی بچت کے سیونگ سرٹیفکیٹس پر منافع کی ادائیگیاں اچانک روکنے پرتشویش کا اظہار کرتے ہوئے حکومت سے اس مسئلے پر غور کرنے کا مطالبہ کردیا۔

کراچی چیمبر کے صدر شارق وہرا نے کہاہے کہ منافع کی ادائیگیوں میں تاخیر کی وجہ سے بزرگ، ریٹائرڈ افراد اور بیواؤں سمیت کئی ایسے افراد کی مشکلات میں اضافہ ہوگا جنکی روزمرہ زندگی کا انحصار ان ادائیگیوں پر ہے،کے سی سی آئی کو نیشنل سیونگ سرٹیفکیٹس میں کی گئی سرمایہ کاری پربغیر کسی وجہ کے منافع کی ادائیگیاں روکنے کی شکایات موصول ہوئی ہیں۔

یہ بات عیاں ہے کہ یہ ادائیگیاں زیادہ تر بزرگ شہریوں اور بیوہ خواتین کی ہوتی ہیں جو اپنی زندگی بھر کی جمع پونجی بچت سرٹیفکیٹس میں لگاتے ہیں تاکہ وہ ماہانہ بنیاد پر حاصل ہونے والی آمدنی سے گزر بسر کرسکیں لہٰذا اس طرح ان لوگوں کے گزر بسر سے وابستہ اہم ادائیگیوں کو روکنا واقعی غیر منصفانہ ہے۔

انھوں نے وزارت خزانہ اور اسٹیٹ بینک سے عوام کو بچت سرٹیفکیٹس کی مد میں منافع کی فوری ادائیگیاں کرنے ہدایت جاری کرنے کی درخواست کی تاکہ ان کے معمولات زندگی کو متاثر ہونے سے بچایا جا سکے۔