پاکستان کسٹمز نے بڑی مقدار میں منشیات بحرین بھیجنے کی کوشش ناکام بنادی

برآمد شدہ کرسٹل کا وزن 4.10 کلوگرام اور مالیت 4 کروڑ 10 لاکھ روپے ہے، ڈپٹی کلکٹر کسٹمز

---

پاکستان کسٹمز نے پاکستان سے ایمیٹامائن کرسٹل بحرین بھیجنے کی کوشش ناکام بنادی۔

پاکستان کسٹمز جناح ائیرپورٹ کی پاکستان پوسٹ ایکسپریس میل سروس ایکسپورٹ شاہراہ فیصل پر ایک کامیاب کاروائی میں پاکستان سے خشک میوہ جات پارسل کی آڑ میں منشیات بھیجنے کی کوشش ناکام بنادی ہے۔ پاکستان سے بذریعہ پارسل 14 سیل شدہ ٹن پیک کےذریعے ایمیٹامائن کرسٹل بحرین بھیجی جارہی تھی۔

ڈپٹی کلکٹر کسٹمز انعام وزیر نے ایکسپریس کو بتایاکہ 14سیل شدہ ٹن پیک میں برآمد شدہ ایمیٹامائن کرسٹل کا وزن 4.10کلوگرام ہے جس کی بین الاقوامی مارکیٹ میں مالیت 4 کروڑ 10 لاکھ روپے ہے۔ انہوں نے بتایا کہ 14 ٹن پیک پر مشتمل یہ پارسل کراچی کے رہائشی محمد علی نامی شخص نے بک کرایا تھا جسے گرفتار کرکے مجاز عدالت سے ریمانڈ بھی حاصل کرلیا گیا ہے۔

حکام نے کسٹمز نارکوٹکس ایکٹ کے تحت مقدمہ درج کرکے تفتیش شروع کردی ہے۔