یوتھ لون اسکیم اور میرٹ

وزیراعظم نے قرضہ اسکیم میں شفافیت کی جو یقین دہانی کرائی ہے وہ خوش آئند ہے

Editorial January 04, 2014

وزیراعظم نے قرضہ اسکیم میں شفافیت کی جو یقین دہانی کرائی ہے وہ خوش آئند ہے. فوٹو: پی آئی ڈی/فائل

وزیر اعظم میاں محمد نواز شریف نے حیدر آباد میں قرضہ اسکیم کی تقریب سے خطاب میں کرپشن کو کینسر سے تشبیہ دیتے ہوئے یقین دہانی کرائی ہے کہ یوتھ بزنس لون اسکیم کے تحت قرضوں کی شفاف تقسیم ہو گی۔ فیصلے مذہب، رنگ، نسل اور علاقے کی بنیاد پر نہیں ہوں گے۔ وزیر اعظم نے کرپشن کی درست نشان دہی کی ہے اور اگر وسیع تر تناظر میں دیکھا جائے تو یہ کرپشن ہی ہے جو ہماری تمام تکلیفات اور مسائل کی بنیادی وجہ ہے اور اگر اس کینسر کا علاج اس بیماری کے ماہرین سے کرایا جائے کہ جن کے دست ہنر میں شفا کا کرشمہ بھی ہو تو اس مرض کو بالیقین جڑ سے اکھاڑا جا سکتا ہے۔ سوال یہ ہے کہ اس مرض کا علاج کس سطح سے شروع کیا جائے تو اس کا آسان جواب یہ ہے کہ اسے سب سے اوپر والے درجے سے شروع کیا جائے کیونکہ پانی ہمیشہ اوپر سے نیچے بہتا ہے نیچے سے اسے بلا تردد اوپر نہیں پہنچایا جا سکتا۔

وزیر اعظم نے اپنے خطاب میں کہا کہ قرضہ اسکیم میں شفافیت کو اس حد تک مدنظر رکھا گیا ہے کہ میری سفارش بھی نہیں چل سکتی۔ قرضہ اسکیم سے روزگار کے مواقع پیدا ہوں گے۔ وزیر اعظم نے تسلیم کیا کہ قرضہ اسکیم کی شرائط مشکل ہیں لیکن ساتھ ہی یہ بھی کہا کہ اب شرائط کو مزید آسان کر دیا گیا ہے۔ اب گریڈ15 کے سرکاری ملازمین کے علاوہ قرضے سے ڈیڑھ گنا زیادہ مالیت رکھنے والا کوئی بھی عام شہری ضامن بن سکتا ہے، حتیٰ کہ 3 ضامن بھی مجموعی ضمانت دے سکتے ہیں۔ وزیراعظم نے قرضہ اسکیم میں شفافیت کی جو یقین دہانی کرائی ہے وہ خوش آئند ہے۔ اگر اس قرضہ اسکیم میں قانون و ضوابط پر سختی سے عمل کیا گیا تو اس کے یقینی طور پر اچھے نتائج سامنے آئیں گے اور ملک کے نوجوان طبقے کو کاروبار شروع کرنے کے لیے سرمایہ میسر ہو جائے گا۔