صومالیہ میں صدارتی محل پر خود کش حملہ

خود کش حملہ آور سیکیورٹی اہلکاروں کی فائرنگ میں مارا گیا تاہم 7 شہری زخمی اور 12 گاڑیاں تباہ ہوگئیں

ویب ڈیسک February 13, 2021

حملہ آور پولیس کی فائرنگ میں مارا گیا، فوٹو : فائل

صوماليہ کے دارالحکومت ميں واقع صدارتی محل کے اندر خود کش کار بمبار نے داخل ہونے کی کوشش کی جسے سیکیورٹی اہلکاروں نے گولی مار کر ہلاک کردیا۔

عالمی خبر رساں ادارے کے مطابق صومالیہ کے دارالحکومت موغادیشو میں واقع صدارتی محل میں ایک تیز رفتار کار کو سیکیورٹی اہلکاروں نے روکنے کا اشارہ کیا تاہم کار نہیں رکی تو اہلکاروں نے فائرنگ کرکے ڈرائیور کو ہلاک کردیا۔

جیسے ہی سیکیورٹی اہلکاروں نے کار پر فائرنگ کی تو حملہ آور نے کار میں رکھے بارودی مواد کو دھماکے سے اُڑانے کی کوشش کی تاہم بم مکمل طور پر نہ پھٹ سکا، بم مکمل طور پر نہ پھٹنے کے باوجود 7 شہری زخمی ہوئے 12 گاڑیوں کو شدید نقصان پہنچا۔

پوليس کا کہنا ہے کہ مشتبہ خود کش حملہ آور کی شناخت کی جارہی ہے، تاحال کسی شدت پسند گروپ نے حملے کی ذمہ داری قبول نہیں کی ہے تاہم صومالیہ میں القاعدہ سے منسلک مقامی گروہ الشباب پُرتشدد کارروائیوں میں ملوث رہی ہے۔