جی ایس پی پلس پاک یورپ بزنس فورم بنایا جائے گورنر پنجاب

گورنر پنجاب چوہدری محمد سرور نے کہا ہے کہ یورپی منڈیوں میں جی ایس پی پلس اسٹیٹس کے فیصلے سے بھرپور استفادہ کرنے اور یورپ سے تجارتی سرگرمیوں کو فروغ دینے کے لیے پاکستان یورپ بزنس فورم تشکیل دیا جائے گا جس میں مختلف شعبوں کے سرمایہ کار تاجر اور اہم شخصیات کو شامل کیا جائے گا۔

یہ بزنس فورم یورپی ملکوں کے ساتھ تجارت کے امکانات سے بھرپور استفادہ کرنے کے لیے وزارت تجارت اور خزانہ کے ساتھ مل کر کام کریں گے۔ گورنر ہائوس لاہور میں ایوان صنعت و تجارت فیصل آباد کے وفد سے گفتگو کرتے ہوئے انھوں نے کہا کہ معاشی ترقی کے اہداف حاصل کرنے کیلیے تجارتی اور کاوروباری سرگرمیوں کا فروغ ناگزیر ہے، یہی وجہ ہے کہ حکومت موثر منصوبہ بندی کے تحت ملک میں سرمایہ کاری کے فروغ کے لیے کوشاں ہے۔




انہوں نے کہا کہ ہمیں پاکستان کی ترقی اور خوشحالی کے لیے متحد ہو کر آگے بڑھنا ہوگا تاکہ جی ایس پی پلس اسٹیٹس سے بھر پور استفادہ کیا جا سکے۔ گورنر نے کہا کہ موجودہ حکومت ٹیکسٹائل سیکٹر کو درپیش مسائل کو دور کرنے کیلیے اپنے تمام تر وسائل کو بروئے کا ر لارہی ہے۔ انہوں نے کہا کہ وزیر اعظم محمد نواز شریف کی واضح ہدایت کے مطابق صنعتوں کو ہفتے میں دو دن گیس کی سپلائی ہر ممکن یقینی بنایا جائے گا۔