اسلام آبادایئرپورٹ پرٹگ وین پی آئی اےطیارے سے جاٹکرائی کیٹرنگ وین کو بھی نقصان

سول ایوی ایشن اتھارٹی نے واقعے کی تحقیقات کا آغاز کردیا فوٹو: فائل

---

ایئرپورٹ پر ٹگ وین بے قابو ہوکر پی آئی اے طیارے سے جاٹکرائی جس سے کیٹرنگ وین کو بھی نقصان پہنچا۔

ایکسپریس نیوز کے مطابق اسلام آباد انٹر نیشنل ایئرپورٹ میں پی آئی اے کا ابوظہبی سے آنے والا طیارہ پارکنگ بے نمبر 8 میں پارک تھا کہ بے قابو ٹگ وین طیارے کے باٹم ہولڈ سے ٹکرائی اور پی آئی اے کیٹرنگ گاڑی کو بھی نقصان پہنچا۔

ذرائع کا کہنا تھا کہ ٹگ وین کا ڈرائیور نیاز علی اچانک بے ہوش ہوگیا تھا جس کی وجہ سے ٹگ وین بے قابو ہوکر جہاز اور کیٹرنگ وین سے ٹکرائی، سول ایوی ایشن ٹیموں نے موقع پر پہنچ کر بے یوش ڈرائیور کو ٹراما سینٹر منتقل کیا،ابتدائی طبی امداد کے بعد متاثرہ ڈرائیور کو اسلام آباد کے نجی اسپتال میں منتقل کردیا گیا ہے، سول ایوی ایشن اتھارٹی نے واقعے کی تحقیقات کا آغاز کردیا ہے، پی آئی اے حکام نے متاثرہ جہاز کو بھی اڑان نہ بھرنے کی ہدایت کردی ہے۔