امریکا نے جوہری معاہدے میں واپسی کیلیے ایران سے بات چیت کیلیے آمادگی ظاہر کردی

ایران جوہری معاہدے کی مکمل پاسداری کرے تو واشنگٹن دوبارہ معاہدے میں شامل ہوجائے گا، امریکی سیکریٹری آف اسٹیٹ

ویب ڈیسک February 19, 2021

جوہری معاہدے پر ایران سے بات چیت کیلیے تیار ہیں۔ امریکی سیکریٹری آف اسٹیٹ

HYDERABAD: امریکی سیکریٹری آف اسٹیٹ کا کہنا ہے کہ واشنگٹن ایران کے ساتھ جوہری معاہدے کی بحالی کے حوالے سے بات چیت کے لیے تیار ہے۔

غیر ملکی خبررساں ادارے کے مطابق امریکی سیکریٹری اسٹیٹ انٹونی بلنکن نے ایران کے ساتھ جوہری معاہدے کی بحالی پر آمادگی ظاہر کرتے ہوئے کہا کہ اگر ایران جوہری معاہدے کی مکمل پاسداری کرے تو واشنگٹن دوبارہ معاہدے میں شامل ہوجائے گا۔

پیرس میں برطانیہ، فرانس اور جرمنی کے وزرائے خارجہ کا اہم اجلاس ہوا جس میں امریکی سیکریٹری اسٹیٹ نے ویڈیو کال کے ذریعے شرکت کی۔ اس دوران انہوں نے امریکی صدر جوبائیڈن کی جانب سے ایران کو دیے گئے واضح پیغام کو دہراتے ہوئے کہا کہ ایران معاہدے میں شامل ہونا چاہتا ہے تو اسے 2015 کے جوہری معاہدے کے شرائط کو پورا کرنا ہوگا۔

خیال رہے 2015 میں امریکی صدر اوباما نے ایرانی جوہری پروگرام کو محدود کرنے کے لیے معاہدہ کیا تھا جس کے تحت ایران پر تجارتی پابندیوں میں کمی کردی گئی تھی تاہم 2018 میں ڈونلڈ ٹرمپ نے یک طرفہ جوہری معاہدے سے دستبرداری کا اعلان کرتے ہوئے دوبارہ ایران پر پابندی عائد کردی تھی جس پر ایران نے معاہدے کی تعمیل کو روک کر یورینیم کی افزودگی شروع کر دی تھی۔

بعد ازاں پیرس ملاقات کے بعد چاروں اقوام کی جانب سے ایک مشترکہ اعلامیہ جاری کیا گیا جس میں کہا گیا کہ اگر ایران جے سی پی او اے (جوائنٹ کمپری ہینسو پلان آف ایکشن) کے تحت اپنے وعدوں پر سختی سے عمل کرے تو امریکا بھی اپنا وعدہ پورا کرے گا اور اس حوالے سے ایران سے بات چیت کرنے کے لیے تیار ہیں۔

Instead of sophistry & putting onus on Iran, E3/EU must abide by own commitments & demand an end to Trump's legacy of #EconomicTerrorism against Iran

Our remedial measures are a response to US/E3 violations. Remove the cause if you fear the effect

We'll follow ACTION w/ action.
— Javad Zarif (@JZarif) February 18, 2021

دوسری جانب ایرانی وزیرخارجہ جواد ظریف نے ٹوئٹ کرتے ہوئے کہا کہ ایران کو ذمہ دار ٹہرانے، غلط بیانی کے بجائے ' یورپین یونین/ ای تھری' اپنے وعدے کی پاسداری کرے اور ڈونلڈ ٹرمپ کی جانب سے ایران کے خلاف عائد معاشی دہشتگردی کے خاتمے کا مطالبہ کرے جب کہ ہماری جانب سے احتیاطی اقدامات امریکا اور یورپ کی خلاف ورزی کے جواب میں کیے گئے ہیں۔

US acknowledged Pompeo's claims re Res. 2231 had no legal validity.

We agree.

In compliance w/ 2231:

US unconditionally & effectively lift all sanctions imposed, re-imposed or re-labeled by Trump.

We will then immediately reverse all remedial measures.

Simple: #CommitActMeet
— Javad Zarif (@JZarif) February 19, 2021

ایک اور ٹوئٹ میں ایرانی وزیرخارجہ کا کہنا تھا کہ امریکا بغیر کسی شرط کے ٹرمپ کی جانب سے ایران پر عائد تمام پابندیاں ختم کرے تو تہران بھی احتیاطی اقدامات واپس تبدیل کردے گا۔