کراچی میں کلہاڑی کے وار سے پسند کی شادی کرنے والا شخص قتل، بیوی اغوا

اسٹاف رپورٹر  جمعـء 26 فروری 2021
ملزمان نے ماں اور بہن کو شدید زخمی کر دیا

ملزمان نے ماں اور بہن کو شدید زخمی کر دیا

 کراچی: عوامی کالونی پولیس کی ناقص کارکردگی کا پول کھل کر سامنے آگیا ، کورنگی ضیا کالونی میں کلہاڑی سے مسلح ملزمان نے گھر میں گھس کر ایک شخص کو پے در پے وار کر کے قتل جبکہ مقتول کی والدہ اور بہن کو شدید زخمی کر دیا۔

ملزمان ڈسٹرکٹ کورنگی عوامی کالونی پولیس کی نااہلی کا بھرپور فائدہ اٹھاتے ہوئے مقتول کی بیوی کو بھی اغوا کر کے فرار ہوگئے جس سے بخوبی اندازہ لگایا جا سکتا ہے کہ ملزمان کو پولیس کا کوئی ڈر و خوف نہیں تھا۔

اس حوالے سے ترجمان کورنگی پولیس کا کہنا ہے کہ عوامی کالونی کے علاقے کورنگی ضیا کالونی بنگالی پاڑہ کے قریب گھر میں زبردستی 3 نامعلوم افراد نے گھس کر 26 سالہ عبدالستار نامی شخص کو کلہاڑیوں کے وار کر کے قتل کر دیا جبکہ مقتول کی والدہ اور بہن کو بھی زخمی کر دیا۔

ترجمان کورنگی پولیس کے مطابق ابتدائی تفتیش کے مطابق 3 سال قبل مقتول عبدالستار نے پسند کی شادی کی تھی اور اپنے آبائی گاؤں سے بھاگ کر کراچی آگیا تھا تاہم لڑکی کے اہلخانہ نے موقعہ پا کر ان کے گھر پر حملہ کر دیا۔ اب تک کی اطلاع یہ ہے کہ مقتول کی اہلیہ کا کچھ پتہ نہیں چل سکا جو سکھر کی رہاشی بتائی جاتی ہے تاہم ابتدائی طور پر یہی شبہ ہے کہ ملزمان مقتول کی بیوی کو واردات کے بعد زبردستی اپنے ساتھ لیکر فرار ہوگئے ہیں ، کلہاڑی کے وار سے زخمی ہونے والی ماں اور بیٹی کی حالت تشویشناک بتائی جاتی ہے ۔

ایکسپریس میڈیا گروپ اور اس کی پالیسی کا کمنٹس سے متفق ہونا ضروری نہیں۔