کراچی میں آپریشن کے باوجود حالات جوں کے توں ہیں منور حسن

حکومت نے عوام کی مشکلات میں اضافہ کر دیا،نیٹو سپلائی بندش کا سرکاری اعلان کیا جائے۔ فوٹو: فائل

---

امیر جماعت اسلامی سید منور حسن نے کراچی میں ایک ہی دن 17افراد کے قتل پر گہرے افسوس اور تشویش کا اظہار کرتے ہوئے کہا کہ 2 ماہ سے جاری آپریشن کے باوجود حالات جوں کے توں ہیں، شہر میں روزانہ لاشیں گرتی ہیں مگر قاتلوں کا سراغ نہیں ملتا۔

جماعت اسلامی کی مجلس شوریٰ کے 3 روزہ اجلاس کے آخری روز وفود اور میڈیا نمائندوں سے گفتگو کرتے ہوئے منور حسن نے کہا کہ روشنیوں کے شہر کراچی میں اندھیروں کا راج ہے، ایم کیوایم کے اقتدار میں آنے سے کراچی گزشتہ 18سال سے بھتہ خوری، ٹارگٹ کلنگ سمیت سنگین وارداتوں کا گڑھ بنا ہوا ہے، آج یہ عفریت ملک توڑنے اور علیحدگی کے مطالبے تک پہنچ گیا ہے، اگر ان عناصر پر بروقت قابو پا لیا جاتا تو آج یہ صورتحال نہ ہوتی۔



قبل ازیں جماعت اسلامی کی مرکزی مجلس شوریٰ نے موجودہ سیاسی حالات اور قومی سلامتی کو درپیش خطرات پر گہری تشویش کا اظہار کرتے ہوئے قرارداد میں کہا کہ یہ صورتحال المیے سے کم نہیں کہ موجودہ حکومت نے بھی غیرملکی ایجنڈے اور آئی ایم ایف کی ہدایات پر عملدرآمد کا راستہ اختیار کرتے ہوئے عوام کی مشکلات میں بے پناہ اضافہ کر دیا ہے، حکمرانوں نے جرأت مندانہ پالیسی اپنانے کے بجائے امریکا کی خوشنودی اور بھارت سے غیر مشروط دوستی کو اپنی تمام پالیسیوں کا محور بنا لیا ہے۔ قرارداد میں مطالبہ کیا گیا کہ مرکزی حکومت واضح اعلان کرے کہ جب تک بھارت مقبوضہ کشمیر سمیت تنازعات کو حل کرنے اور پاکستان میں تخریب کاری کے خاتمہ کا اعلان نہیںکرتا، دوستی کی پینگیں نہیں بڑھائی جائیںگی، امریکی غلامی کی پالیسی کو ختم کرتے ہوئے پہلے مرحلہ میں نیٹو سپلائی کے خاتمے کا سرکاری اعلان کیا جائے، سود کی لعنت ختم کی جائے۔