پیداواری بجلی پر اختیارخلاف آئین نہیں وزیر اعلیٰ پختونخوا

خیبرپختونخواکے وزیراعلیٰ پرویزخٹک نے کہا ہے کہ پختونخوا میں بجلی کی پیداوار اور ضرورت میں زمین آسمان کا فرق ہے جس کا اختیار اگر صوبے کو مل جائے تو نہ صرف آئین اور صوبائی خودمختاری کے تقاضے پورے ہوںگے بلکہ یہ صوبے کی ترقی اور قومی یکجہتی کے فروغ میں سنگ میل قدم ثابت ہو گا۔

اس مقصد کیلیے وہ وزیراعظم اور وزیر پانی و بجلی کو خطوط بھی لکھ چکے ہیں جن کے جواب کا انتظار ہے اور ہم مرکز سے اچھی توقع رکھتے ہیں۔ وہ اتوارکو رکن صوبائی اسمبلی محمود جان کی قیادت میں آنے والے خدمتگار قومی جرگے کے وفد سے گفتگو کررہے تھے۔ جس نے علاقے کے بعض مسائل سے انھیں آگاہ کیا جن میں سرفہرست ورسک ڈیم کے متاثرین کے بجلی بلوں کے بقایاجات کامسئلہ تھا۔




وزیراعلیٰ پختونخوانے کہا کہ پی ٹی آئی حکومت آزاداور خودمختار احتساب کمیشن قائم کر رہی ہے، احتساب کمیشن ماضی کے حکمرانوں کے علاوہ حکومت وقت کے وزیر اعلیٰ اور وزراسمیت بڑے سے بڑے افسر کا احتساب کر سکے گا۔