کورونا کے بڑھتے کیسز کے باعث پی ایس ایل 6 ملتوی

پاکستان سپر لیگ کے چھٹے ایڈیشن میں اب تک 6 کھلاڑی کورونا میں مبتلا ہوچکے ہیں

---

پاکستان سپر لیگ کے چھٹے ایڈیشن میں کورونا کے بڑھتے کیسز کے باعث لیگ ملتوی کردیا گیا۔

پاکستان کرکٹ بورڈ کی جانب سے پی ایس ایل 6 میں کورونا وائرس کے بڑھتے ہوئے کیسز کے باعث 20 فروری سے شروع ہونے والی لیگ کو ملتوی کردیا گیا ہے۔

پی سی بی اور ٹیم مالکان کے درمیان منعقدہ ورچوئل میٹنگ کے بعد پاکستان کرکٹ بورڈ نے پاکستان سپر لیگ 6 کو فوری طور پر ملتوی کرنے کا اعلان کیا۔ پی سی بی اب فوری طور پر تمام 6 ٹیموں کے شرکاء کی پی سی آر ٹیسٹنگ، کورونا ویکسین اور آئسولیشن سہولیات کے لیے اقدامات کرے گا۔

📢 HBL PSL 6 POSTPONED

PCB Chief Executive Wasim Khan, Director - Commercial and Babar Hamid, will hold a media conference at the National Stadium at 3pm to provide further updates.

Read more:https://t.co/GM68WWmnT8

#HBLPSL6

- PakistanSuperLeague (@thePSLt20) March 4, 2021

پاکستان کرکٹ بورڈ کے چیف ایگزیکٹو وسیم خان اور ڈائریکٹر کمرشل بابرحامدسہ پہر تین بجے نیشنل اسٹیڈیم کراچی میں منعقدہ پریس کانفرنس میں مزید تفصیلات سے آگاہ کریں گے۔ پریس کانفرنس روم میں محدود جگہ کے باعث ویڈیو کیمرہ پرسنز کو پریس کانفرس میں شرکت کی اجازت نہیں ہوگی تاہم پی سی بی اپنے یو ٹیوب چینل پر پریس کانفرنس کو لائیو اسٹریم کرے گا۔

قومی کھلاڑیوں کا اظہار افسوس

پی ایس ایل کے ملتوی ہونے پر قومی کرکٹرز بھی افسردہ نظر آئے اور سوشل میڈیا پر اپنے جذبات کا اظہار کر رہے ہیں۔

Sad news about #PSL6 Everyone stay safe

- Mohammad Hafeez (@MHafeez22) March 4, 2021

محمد حفیظ نے اس کو افسوسناک خبر قرار دیتے ہوئے اپنے پرستاروں کے کورونا سے محفوظ رہنے کی دعا کی ہے۔ قومی ٹیم کے فاسٹ بولر حسن علی نے ٹوئٹ کرتے ہوئے کہا ''پی ایس ایل کو نظر لگ گئی۔ شاداب خان نے کچھ اسی طرح کی ٹوئٹ کی۔

Ya Allah humary psl ko kis ke nazar laga de 😭😭😭

- Shadab Khan (@76Shadabkhan) March 4, 2021

دوسری جانب چند گھنٹے قبل کراچی کنگز کے آسٹریلوی کھلاڑی ڈینیئل کرسٹین نے پی ایس ایل 6 سے دستبرداری کا اعلان کردیا تھا جس کی تصدیق پی سی بی نے خود کرتے ہوئے کہا کہ کراچی کنگز کے آل راؤنڈر ڈین کرسٹین دبئی روانہ ہورہے ہیں۔ ذرائع کے مطابق قومی ٹیم کے سابق کپتان اور کراچی کنگز کے بولنگ کوچ وسیم اکرم بھی پی ایس ایل چھوڑنے کے حوالے سے مشاورت کررہے تھے کیوں کہ ڈاکٹرز نے انہیں مشورہ دیا تھا کہ وہ فوراً لیگ چھوڑدیں کیوں کہ ذیابطیس کی وجہ سے انہیں خطرہ ہو سکتا ہے ۔

📰 HBL PSL 6 Covid-19 tests update https://t.co/Ur15qJ36TY#MatchDikhao l #HBLPSL6 - PakistanSuperLeague (@thePSLt20) March 4, 2021

اس سے قبل پاکستان کرکٹ بورڈ کی جانب سے تصدیق کی گئی تھی کہ پی ایس ایل 6 کی 2 ٹیموں کے مزید 3 کھلاڑیوں کے کورونا ٹیسٹ کی رپورٹ مثبت آئی ہے۔ یہ تینوں کھلاڑی اب 10 روز تک آئسولیشن میں رہیں گے۔

ان تینوں کھلاڑیوں نے بدھ کے روز ایچ بی ایل پی ایس ایل 6 کے منعقدہ ڈبل ہیڈر میچز میں شرکت نہیں کی۔ ان تینوں کھلاڑیوں میں علامات ظاہر ہونے کے بعدان کے کورونا ٹیسٹ گذشتہ روز دوپہر میں کروائے گئے تھے۔

ایچ بی ایل پی ایس ایل 6 کی آرگنائزنگ کمیٹی آج بروز جمعرات تمام ٹیموں کے مالکان اور ان کی منیجمنٹ کے ساتھ ورچوئل میٹنگ میں شرکت کرے گی، جس کی تفصیلات بعد میں شیئر کی جائیں گی۔

لاہور قلندرز نے بائیو سیکیور ببل پر سوال اٹھادیے

فرنچائز کے سی ای او عاطف رانا نے ایکسپریس سے بات کرتے ہوئے کہا کہ پی سی بی بائیوسکیور ببل کے پروٹوکولز پر عمل درآمد کرانے میں ناکام رہا۔ ایک فرنچائز کے مالک کو کھلاڑیوں کو گلے لگانے پر بھی معاف کر دیا گیا۔

عاطف رانا نے کہا کہ بورڈ کو صرف کاغذی بائیو سکیور ببل نہیں بنانا بلکہ اس پر ہوٹل اور وینیو میں عمل درآمد کروانا تھا مگر ایسا نہیں کیا گیا۔عاطف رانا نے کہا کہ پی سی بی کو چاہیے تھا کہ کورونا ایس او پیز کی خلاف ورزی کرنے والے کھلاڑیوں یا آفیشلز پر جرمانے عائد کیے جاتے۔

میچز ملتوی ہونے پر مایوسی کااظہار کرتے ہوئے انہوں نے کہا کہ لاہور قلندرز نے پہلےہی پی سی بی سے کہا تھا کہ کورونا کی وبا کے دوران ایونٹ کا انعقاد نہ کیا جائے، بورڈ نے ان کی نہیں سنی اور دیگر فرنچائز کی مشاورت سے ایونٹ کروانے کا فیصلہ کر لیا گیا، اس صورتحال میں سخت احتیاط برتے جانے کی ضرورت تھی مگر غفلت کا مظاہرہ سامنے آیا۔

کورونا متاثرین کی تعداد 7 ہوگئی

پی ایس ایل کے چھٹے ایڈیشن کے دوران 7 افراد کے کورونا ٹیسٹ مثبت آئے ہیں جن میں 6 کھلاڑی اور ایک آفیشل شامل ہے جب کہ پی سی بی کی جانب سے تمام کھلاڑیوں کو کورونا ویکسین لگانے کی پیشکش بھی کی گئی تھی۔

پی ایس ایل پوائنٹس ٹیبل

20 فروری سے شروع ہونے والے پاکستان سپر لیگ کے چھٹے ایڈیشن میں کل تک 14 میچز کھیلے گئے ہیں جس میں کراچی کنگز 6 پوائںٹس کے ساتھ پوائنٹس ٹیبل پر سرفہرست ہے۔ پشاور زلمی بھی 3 میچ جیت کر 6 پوائنٹس لینے میں کامیاب رہی تاہم وہ رن ریٹ کی وجہ سے دوسرے نمبر پر ہے۔ اسلام آباد یونائیٹڈ اور لاہور قلندرز 6،6 پوائنٹس کے ساتھ تیسرے اور چوتھے نمبر پر موجود ہیں۔

دوسری جانب لیگ میں واحد میچ جتینے والی ملتان سلطانز اور کوئٹہ گلیڈی ایٹرز 2,2 پوائنٹس کے ساتھ بالتریب پانچویں اور چھٹی پوزیشن پر براجمان ہیں۔

واضح رہے پی ایس ایل 6 کے تمام میچز 7 مارچ تک کراچی میں ہونا تھے اور دیگر میچز لاہور میں شیڈول تھے تاہم کورونا کے بڑھتے کیسز کی وجہ سے گزشتہ روز ہی لاہور سے میچز کراچی منتقل کرنے پر غور کیا گیا تھا۔