بیٹی کیلیے شاہین آفریدی کا رشتہ آیا ہے شاہد آفریدی کی تصدیق

دونوں خاندان رشتے کے حوالے سے رابطے میں ہیں، شاہد آفریدی (فوٹو : فائل)

---

سابق کپتان شاہد آفریدی نے اپنی صاحبزادی کے لیے فاسٹ بولر شاہین آفریدی کا رشتہ آنے کی تصدیق کردی ہے۔

قومی ٹیم کے سابق کپتان شاہد آفریدی کی صاحبزادی اور فاسٹ باؤلر شاہین آفریدی کی منگنی کی خبریں کچھ دنوں سے زیر گردش ہیں جب کہ شاہین آفریدی کے والد بھی اس کی تصدیق کرچکے ہیں تاہم اب شاہد آفریدی نے بھی رشتہ آنے کی تصدیق کردی ہے۔

سماجی رابطے کی ویب سائٹ ٹوئٹر پر سابق کپتان شاہد آفریدی نے لکھا کہ شاہین آفریدی کے اہل خانہ نے میری بیٹی کے لیے رشتہ بھیجا ہے جس کے لیے دونوں خاندان رابطے میں ہیں۔ جوڑے آسمانوں پر بنتے ہیں اور اگر اللہ تعالیٰ کی مرضی ہوگی تو یہ جوڑی بھی بن جائے گی۔ شاہین آفریدی کی ہر میدان میں کامیابی کے لیے دعاگو ہوں۔

Shaheen's family approached my family for my daughter. Both families are in touch, matches are made in heaven, if Allah wills this match will be made too. My prayers are with Shaheen for his continued success on and off the field.

— Shahid Afridi (@SAfridiOfficial) March 7, 2021

شاہد آفریدی کی ٹوئٹ پر شاہین شاہ آفریدی نے جواب میں کہا کہ الحمد للہ، لالہ آپ کی دعاؤں کا شکریہ اللہ تعالی ہر کسی کے لیے آسانیاں پیدا کرے،آپ قوم کا افتخار ہیں۔

Alhumdulillah. Thanks Lala for your prayers. May Allah SWT make things easier for everyone. You are the pride of entire nation. https://t.co/xfQYnb0ONZ

— Shaheen Shah Afridi (@iShaheenAfridi) March 7, 2021

قبل ازیں شاہین شاہ آفریدی کے والد ایاز خان نے دعویٰ کیا تھا کہ دونوں خاندان کے درمیان تعلقات پرانے ہیں، شاہین آفریدی کے لیے بیٹی کے رشتے پر شاہد آفریدی کے خاندان نے رضامندی ظاہر کی ہے اور جلد منگنی کی رسم ادا کی جائے گی۔

یہ خبر پڑھیں : شاہین شاہ کے والد نے بیٹے کیلیے آفریدی کی بیٹی کا رشتہ مانگ لیا

اس حوالے سے شاہد آفریدی کے اہل خانہ کا کہنا تھا کہ دونوں خاندان رشتے کے معاملے پر رابطے میں ہیں۔ بچوں کی عمریں ابھی کم ہیں، شاہین ابھی کرکٹ میں اپنا نام بنا رہے ہیں اور بیٹی پڑھ رہی ہے اس لیے کوئی بھی رسم دو سال بعد ہی ادا کی جائے گی۔