آئی سی سی ٹیسٹ چیمپئن شپ فائنل کا میدان ساؤتھمپٹن میں سجے گا

کونسل نے انگلینڈکی مشاورت سے مقابلہ لندن سے منتقل کرنے کا فیصلہ کرلیا۔

Sports Reporter March 11, 2021

ایسوسی ایشنزفرسٹ بورڈزکے سربراہوں کی پی سی بی آفیشلزسے ملاقات شیڈول فوٹو : فائل

اولین ورلڈ ٹیسٹ چیمپئن شپ کے فائنل کا میدان ساؤتھمپٹن میں سجے گا جب کہ آئی سی سی نے انگلش بورڈ کی مشاورت سے مقابلہ لندن سے منتقل کرنے کا فیصلہ کرلیا۔

انٹرنیشنل کرکٹ کونسل نے انگلش بورڈ سے مشاورت کے بعد اولین ورلڈ ٹیسٹ چیمپئن شپ کا فائنل لندن سے ساؤتھمپٹن منتقل کرنے کا باضابطہ اعلان کردیا،نیوزی لینڈ اور بھارت کی ٹیمیں اب لارڈز کے بجائے ہیمپشائر باؤل میں مقابل ہونگی، 18سے 22جون تک شیڈول فیصلہ کن معرکے کیلیے بائیو سیکیور ببل بنایا جائے گا۔

آئی سی سی بورڈ کے مطابق گذشتہ سیزن کے دوران ہیمپشائر باؤل ایک محفوظ ترین وینیو کے طور پر سامنے آیا، یہاں کھلاڑیوں کی رہائش کیلیے ملحقہ ہوٹل ہونے کی وجہ سے بائیو سیکیورٹی کے انتظامات دیگر اسٹیڈیمز کی بانسبت آسان ہیں، ان کی بدولت کورونا وائرس کے خطرات کم کرنے میں مدد ملے گی، ٹریننگ اور میچ کیلیے ورلڈکلاس سہولیات بھی میسر ہیں۔

پریس ریلیز میں یہ بھی بتایا گیا کہ برطانوی حکومت کی طرف سے لاک ڈاؤن کی پابندیوں میں بتدریج کمی کا سلسلہ جاری رہا تو تماشائیوں کی محدود تعداد کو ٹیسٹ چیمپئن شپ کا فائنل اسٹیڈیم میں آکر دیکھنے کی اجازت دی جا سکتی ہے، دلچسپی رکھنے والے شائقین کیلیے رجسٹریشن کا عمل شروع کردیا گیا، حتمی فیصلہ صورتحال دیکھ کر ہوگا۔

آئی سی سی کے جنرل منیجر جیف ایلرڈائس کا کہنا ہے کہ دنیا کی 2 بہترین ٹیسٹ ٹیموں کا مقابلہ کرواتے ہوئے پہلی ترجیح کھلاڑیوں، معاون اسٹاف ارکان اور آفیشلز کی صحت و سلامتی ہے، اسی کو پیش نظر رکھتے ہوئے ساؤتھمپٹن کاانتخاب کیا گیا۔

انگلینڈ اینڈ ویلز کرکٹ بورڈ کے چیف ایگزیکٹیو ٹام ہیریسن نے کہاکہ ہم کورونا وبا کے باوجود یہاں مقابلوں کا کامیاب انعقاد کرچکے، فائنل بھی ایک یادگار موقع ہوگا۔