حفیظ شیخ نے ہارنے کے بعد عوامی عہدہ نہیں چھوڑا کیا یہ جمہوریت ہے لاہور ہائیکورٹ

وفاقی وزیر خزانہ عبدالحفیظ شیخ کے پاکستان میں اثاثوں کا ریکارڈ طلب

---

لاہور ہائیکورٹ کے چیف جسٹس قاسم خان نے ریمارکس دیے ہیں کہ حفیظ شیخ نے ہارنے کے بعد عوامی عہدہ نہیں چھوڑا کیا یہ جمہوریت ہے؟۔

لاہور ہائیکورٹ میں وزیراعظم کے معاونین خصوصی کی تقرریوں کے خلاف کیس کی سماعت ہوئی۔ چیف جسٹس ہائی کورٹ قاسم خان نے وفاقی وزیر خزانہ عبدالحفیظ شیخ کے پاکستان میں اثاثوں سے متعلق ریکارڈ طلب کرلیا۔

یہ بھی پڑھیں: وزیراعظم سے ملاقات کے بعد حفیظ شیخ کا وزارت سے استعفیٰ نہ دینے کا فیصلہ

چیف جسٹس قاسم خان نے ریمارکس دیے کہ جمہوریت کا لفظ لکھ دینے سے ملک میں جمہوریت نہیں آجاتی، بڑی بڑی باتیں کرنے سے ملک جمہوری نہیں ہوجاتا، عبدالحفیظ شیخ نے ہارنے کے بعد عوامی عہدہ نہیں چھوڑا کیا یہ جمہوریت ہے؟، کیا ہارنے کے بعد انہیں کسی عوامی عہدہ پر رہنا چاہیے، بتائیں انہوں نے کتنا انکم ٹیکس دیا؟۔

یہ بھی پڑھیں: آئین اجازت دیتا ہے چھ ماہ تک وزیر رہ سکتا ہوں، حفیظ شیخ

چیف جسٹس قاسم خان نے کہا کہ کیا عبدالحفیظ شیخ کی پاکستان میں پراپرٹی ہے ؟، لگتا ہے کام ختم ہونے پر عبدالحفیظ شیخ بیگ اٹھاکر روانہ ہوجائیں گے، جمہوری ملکوں میں لوگ ہارنے کے بعد خود مستعفی ہوجاتے ہیں، کیا عبدالحفیظ شیخ کے علاوہ 22 کروڑ عوام میں کوئی اور حکومت کو نہیں ملا۔