نوجوان بہترکام کرسکتے ہیں حوصلہ افزائی کرنا چاہیے غلام محی الدین

اب دور نوجوانوں کا ہے جو بہتر سوچ کے ساتھ کام کی صلاحیت رکھتے ہیں، فوٹو: فائل

---

سینئر اداکار غلام محی الدین نے کہا ہے کہ فلم انڈسٹری کی بحالی کے بعد اب ہم پر ذمے داریاں بڑھ گئی ہیں کیونکہ ایک طویل جدوجہد کے بعد ہم اس مقصد میں کامیاب ہوئے ہیں کہ لوگوں کو سنیمائوں پر واپس لاسکیں مشکل دور تو گزر گیا لیکن آنیوالا وقت اب ہمارے لیے بہت سے چیلنج لے کر آئیگا اگر اب ہم نے غیر ذمے داری کا مظاہرہ کیا تو ترقی کا سفر کٹھن ہوجائے گا۔

یہ بات انھوں نے ایک انٹرویو کے دوران کہی ۔غلام محی الدین کاکہنا تھا کہ فلم انڈسٹری کے حالات مزید بہتر بنانے کے لیے جدوجہد کرنا ہوگی اور ایسا لائحہ عمل بنانا ہوگا کہ ہمیں ترقی کی منازل آسانی سے طے کر کے فلم انڈسٹری کو آگے بڑھانے میں مدد دے سکیں۔



انھوں نے کہا کہ اب دور نوجوانوں کا ہے جو بہتر سوچ کے ساتھ کام کی صلاحیت رکھتے ہیں، ہمیں ان کی حوصلہ افزائی کرنی چاہیے کیونکہ ہم سب کا مستقبل ملک کی بہترین فلم انڈسٹری سے وابستہ ہے۔