حلقہ این اے249 پی پی اور پی ٹی آئی کارکنان آمنے سامنے

نعرے بازی کی گئی، دونوں جماعتوں کے علاقائی ذمے داروں نے صورتحال کنٹرول کی۔

Staff Reporter March 18, 2021

ضمنی انتخاب کے لیے کاغذات نامزدگی وصول اور جمع کرانے کا مرحلہ مکمل ہوگیا۔ فوٹو : فائل

این اے 249 کے ضمنی انتخاب کے لیے کاغذات نامزدگی جمع کرانے کے دوران پیپلز پارٹی اور تحریک انصاف کے کارکنان آمنے سامنے آگئے۔

الیکشن کمیشن غربی کے دفتر میں فیصل واؤڈا کے استعفی سے خالی ہونے والی نشست این اے 249 کے ضمنی انتخاب کے کاغذات جمع کرانے کے لیے امیدواروں کے ساتھ کارکنان کی بھی بڑی تعداد پہنچی اور ریٹرننگ افسر کے دفتر کے باہر کارکنان کا مجمع لگ گیا، اس دوران پیپلز پارٹی اور تحریک انصاف کے کارکنان آمنے سامنے آگئے۔

دونوں طرف کے کارکنان نے ایک دوسرے کے خلاف شدید نعرے بازی کی، معاملہ تصادم کے قریب پہنچ گیا تھا مگر دونوں جماعتوں کے کچھ علاقائی ذمے داروں نے صورتحال کنٹرول کی۔

دریں اثناء این اے 249 کے ضمنی انتخاب کے لیے کاغذات نامزدگی وصول اور جمع کرانے کا مرحلہ مکمل ہوگیا، مجموعی طور پر 55 امیدواروں نے کاغذات نامزدگی جمع کرادیے جن میں پی ٹی آئی 14، مسلم لیگ (ن) 3، ایم کیو ایم پاکستان 7، پیپلز پارٹی 3، ٹی ایل پی 4، اے این پی، مسلم لیگ جونیجو، مسلم لیگ فنکشنل، ایم ڈبلیو ایم، سنی تحریک، پاکستان راہ حق پارٹی، عام لوگ اتحاد، پاک مسلم الائنس اور پاسبان کے ایک ایک اور 11 آزاد امیدوار شامل ہیں۔