کراچی میں وہ وقت قریب ہے جب سونامی آئے گی اور بڑے بڑے برج گریں گے عمران خان

طاہر القادری سے بات ہوئی ہے جلد ہی ملک بھر میں تاریخی جلسے کریں گے، عمران خان۔ فوٹو: فائل

---

تحریک انصاف کے چیرمین عمران خان نے کہا ہے کہ وہ وقت قریب ہے جب شہر قائد میں بھی سونامی آئے گی جس سے بڑے بڑے برج گرجائیں گے۔

کراچی کے مختلف مقامات پر میڈیا سے بات کرتے ہوئے عمران خان نے کہا کہ وہ کراچی کے لوگوں کے شکر گزار ہیں کہ انہوں نے تحریک انصاف کے امیدواروں کو عام انتخابات میں کامیاب کرایا، کراچی میں بھی عنقریب سونامی آئے گی اور سکھر کے بعد وہ اس شہر میں تاریخی جلسہ عام کریں گے جس کے بعد بڑے بڑے برج گر جائیں گے۔ وہ کراچی میں محمود غزنوی کی طرح بار بار طوفانی انداز میں آئیں گے۔

عمران خان کا کہنا تھا کہ حکومت صوبے میں غیر جانبدارانہ انتخابات کرانا نہیں چاہتی اس لئے حلقہ بندیوں میں بھی میچ فکسنگ کی گئی، اگر بلدیاتی انتخابات شفاف نہ ہوئے تو سڑکوں پرآئیں گے، ان کی طاہر القادری سے بات ہوئی ہے جلد ہی ملک بھر میں تاریخی جلسے کریں گے۔ ان کا کہنا تھا کہ شفاف اور غیر جانبدارانہ احتساب کے لئے تحریک انصاف خیبر پختونکوا میں احتساب بل لے آئی ہے جس سے بڑے بڑے مگر مچھوں کو پکڑا جائے گا۔