عالیہ بھٹ کی فلم ’’ ہائی وے‘‘ کے ٹریلر کے بعد گانے کی ویڈیو بھی جاری

نوران سسٹرز کی آواز میں ریکارڈڈ گانے کے بول ارشاد کامل نے تحریر کیے،فلم کی ہیروئن کو موج مستی کرتے دکھایا گیاہے

Showbiz Desk January 09, 2014

ہائی وے میرے لیے صرف ایک فلم ہی نہیں زندگی کا سفر بھی ہے،عالیہ بھٹ فوٹو: فائل

مہیش بھٹ کی بیٹی عالیہ بھٹ کی فلم ہائی وے کے ٹریلر کے بعد پہلے گانے کی وڈیو بھی جاری کردی گئی ہے ۔

امتیاز علی کی ہدایتکاری میں بنائی جانے والی فلم میں عالیہ بھٹ پہلی مرتبہ رندیپ ہوڈا کے ساتھ جلوہ گر ہورہی ہیں۔ساجد نڈیاڈوالا(Nadiadwala) کی پروڈیوس کردہ اس فلم کی کہانی مختلف خاندانی پس منظر سے تعلق رکھنے والے لڑکے اور لڑکی کے گرد گھومتی ہے جو ٹرک پر سوار ہوکر ہائے وے پر آنیوالی مقبوضہ کشمیر سمیت بھارت کی 5 ریاستوں دہلی ہریانہ راجستھان پنجاب اور ہماچل پردیش کا سفر شروع کرتے ہیں اور اس دوران اْنہیں خود کوجاننے و سمجھنے کا موقع ملتا ہے ۔فلم کا میوزک آسکر ایوارڈ یافتہ موسیقار و گلوکار اے آر رحمان نے ترتیب دیا ہے ۔ 40کروڑ روپے کی لاگت سے بننے والی یہ رومانٹک ڈرامہ فلم یو ٹی وی موشن پکچرزکے تحت رواں سال21فروری کو سینما گھروں کی زینت بنے گی۔

ہدایتکار امتیاز علی نے اپنے ایک انٹرویو کے دوران کہا ہے کہ گزشتہ روز جاری کیا جانے والا ''ہائی وے'' کا گانا ''پٹاخہ گڈی '' فلم کی ہیروئن عالیہ بھٹ جو ''ویرا'' کا کردار ادا کررہی ہیں پر جچتاہے اور ارشاد کامل نے اس گانے کے بول عالیہ بھٹ کو مدنظر رکھ کر لکھے ہیں ۔

گانے کی ریلیز کے ساتھ ہی شائقین کی جانب سے ملنے والا رسپانس خوش آئند ہے ۔ان کا کہنا تھا کہ فلم کے تمام گانے بے حد سریلے سادہ اور دلوں کو چھو لینے والے ہیں مجھے یقین ہے کہ جب باقی گانے بھی ریلیز کیے جائیں گے تو تہلکہ مچا دیں گے ۔ ادھر عالیہ بھٹ کا کہنا ہے ہائی وے میرے لیے صرف ایک فلم نہیں یہ میرے لیے یہ زندگی کا ایک سفر بھی ہے ۔

اس سے مجھے وہ تجربہ حاصل ہوا جو مجھے پہلے کبھی نہیں تھامیں نے آٹھارہ برس کی عمر میں کام کرنا شروع کردیا تھا اور کھبی یہ نہیں کہا کہ میں یہ نہیں کرسکتی مگر اس فلم سے مجھے بہت کچھ سیکھنے کو ملا ۔ عالیہ بھٹ کا مزید کہنا تھا کہ فلم کی شوٹنگ کے دوران مجھے ہر وہ دلچسپ چیزیں اور جگہیں دیکھنے کا موقع ملا جن کے دیکھنے کا میں نے کبھی سوچا یا اس کی خواہش بھی نہیں کی تھی۔

سامبھر میں نمک فیکٹری بہت خوبصورت جگہ ہے اور میرے لیے یہاں کام کرانا ایک عجب تجربہ تھا۔ چیتن بھگت کی تحریر کردہ کہانی پر مبنی پر اس فلم کا میوزک شنکر مہادیوان،احسان نورانی اور لوئے منڈونسا نے ترتیب دیاہے جب کہ عالیہ بھٹ کے ساتھ ارجن کپوراور امریتا سنگھ بھی مرکزی کردار ادا کررہے ہیں اس فلم کو اپریل میں سینما گھروں کی زینت بنایا جائے گاجب کہ شوشان کھیتان کی ہدایتکاری میں بنائی جانے والی فلمساز کرن جوہر کی فلم ہیمپٹی شرما کی دلہنیا میں عالیہ بھٹ ورن دھاون کے ساتھ جلوہ گر ہوں گی۔