بھارتی اداکار کارتک آریان کورونا میں مبتلا ہوگئے

اداکار نے خود کو قرنطینہ کرلیا، فوٹو : فائل

---

لاہور: بھارتی فلم انڈسٹری کے اُبھرتے ہوئے اداکار کارتک آریان کا کورونا ٹیسٹ مثبت آیا ہے جس پر انہوں نے خود کو قرنطینہ کرلیا ہے۔

سماجی رابطے کی ویب سائٹ انسٹاگرام اور مائیکرو بلاگنگ ویب سائٹ ٹوئٹر میں اپنے پیغام میں کارتک آریان نے لکھا کہ کورونا ٹیسٹ مثبت آگیا ہے، میرے لیے دعا کریں۔ اداکار نے ایک تصویر بھی شیئر کی جس میں طبی علامت ''پوزیٹو'' بنا ہوا تھا۔

کارتک آریان کی پوسٹ پر مداحوں نے نیک تمناؤں کا اظہار کرتے ہوئے لکھا کہ کچھ نہیں ہوگا، آپ وائرس کو شکست دیدیں گے جب کہ کچھ صارفین نے ایس اوپیز اور احتیاطوں سے بھرے پیغامات بھی بھیجے۔

Positive ho gaya 🤦🏻‍♂️
Dua karo 🙏🏻 pic.twitter.com/KULStQnkA2

— Kartik Aaryan (@TheAaryanKartik) March 22, 2021

کارتک آریان نے دو روز قبل ہی کیارا ایڈوانی کے ساتھ لیکمے فیشن ویک میں پھربور پرفارمنس دی تھی جس کا اختتام ہفتے کو ہوا اور آج کورونا ٹیسٹ مثبت آنے پر فیشن ویک کے منتظمین اور شرکاء نے بھی ٹیسٹ کرانے کا فیصلہ کیا ہے۔

واضح رہے کہ اس سے قبل کورونا وائرس بھارتی فلم انڈسٹری کے نامور اداکاروں جیسے امیتابھ بچن، ابھیشیک بچن، رنبیر کپور، تمنا بھاٹیہ اور ملائیکہ اروڑا کو متاثر کرچکا ہے۔