صدرعارف علوی اور وزیر دفاع پرویز خٹک بھی کورونا وائرس کا شکار

اللہ سب کورونا متاثرین پر رحم فرمائے، عارف علوی . فوٹو : فائل

---

صدر مملکت ڈاکٹر عارف علوی اور وفاقی وزیر دفاع پرویز خٹک بھی کورونا کا شکار ہوگئے۔

سماجی رابطے کی ویب سائٹ ٹویٹر پر ڈاکٹر عارف علوی نے لکھا کہ میرا کورونا ٹیسٹ مثبت آگیا ہے، اللہ سب کورونا متاثرین پر رحم فرمائے، ویکسین کی پہلی خوراک لی تھی جب کہ دوسری ڈوز ایک ہفتے بعد لگنی تھی جس کے بعد اینٹی باڈیز بننا شروع ہوتی ہیں، برائے مہربانی محتاط رہیں۔

یہ بھی پڑھیں ؛وزیراعظم کورونا وائرس کا شکار ہوگئے

وازا مرضت فھوا یشفین

اور جب میں بیمار ہوتا ہوں تو وہی شفا دیتا ہے

I have tested positive for Covid-19. May Allah have mercy on all Covid affectees. Had 1st dose of vaccine، but antibodies start developing after 2nd dose that was due in a week. Please continue to be careful.

— Dr. Arif Alvi (@ArifAlvi) March 29, 2021

دوسری جانب صدر مملکت کی اہلیہ ثمینہ علوی نے بھی ٹوئٹ کرتے ہوئے کہا کہ الحمدللہ صدر عارف علوی کو درمیانے درجے کی علامات ہیں لیکن وہ پرعزم ہیں، میرا بھی کورونا ٹیسٹ ہوا مگر منفی آیا اور قرنطینہ میں ہوں، ہم نے ویکسین کی پہلی خوراک لگوائی مگر مدافعت بننے میں وقت لگتا ہے اور میں سب سے ویکسین لگوانے اور احتیاط کرنے کی گزارش کروں گی۔

Alhamdulillah President @ArifAlvi has mild symptoms but is in good spirits. I had my test done too & am negative & quarantining. We had our vaccine 1st dose done but it takes time to build immunity & I request everyone to please continue to get vaccinations done & practice SOPs.

— Samina Alvi (@Saminalvi) March 29, 2021

ادھر وزیر دفاع پرویز خٹک بھی کورونا وائرس کا شکار ہوگئے۔ انہوں نے کہا کہ علامات ظاہر ہونے پر ٹیسٹ کرایا جو مثبت آیا جس کے بعد خود کو قرنطینہ کرلیا ہے، کورونا کی تیسری لہر تیزی سے بڑھ رہی ہے عوام احتیاط کریں۔

واضح رہے وزیراعظم عمران خان بھی 20 مارچ کو کورونا کا شکار ہوگئے تھے اور اس سے 2 روز قبل ہی انہوں نے کورونا سے بچاؤ کی ویکسین لگوائی تھی۔