وفاقی کابینہ میں تبدیلیوں کیلیے مشاورت مکمل بعض وزرا کی جگہ نئے چہرے لانے کا فیصلہ

وزارت اطلاعات، توانائی، پیٹرولیم، اقتصادی امور اور کشمیر کمیٹی میں تبدیلی کا امکان، اعلان آج شام تک متوقع

رضوان غلزئی March 29, 2021

وزارت اطلاعات، توانائی، پیٹرولیم، اقتصادی امور اور کشمیر کمیٹی میں تبدیلی کا امکان، اعلان آج شام تک متوقع (فوٹو : فائل)

وفاقی کابینہ میں ردوبدل سے متعلق وزیراعظم نے مشاورت مکمل کرلی جس کا اعلان آج شام تک متوقع ہے، وزارت اطلاعات، توانائی، پیٹرولیم، اقتصادی امور اور کشمیر کمیٹی میں تبدیلی کا امکان ہے جب کہ بعض وزراء فارغ ہوں گے جن کی جگہ نئے چہرے شامل کیے جائیں گے۔

ایکسپریس نیوز کے مطابق وزیراعظم عمران خان نے وفاقی کابینہ میں تبدیلیوں کا حتمی فیصلہ کرلیا۔ وزارت اطلاعات، توانائی، پیٹرولیم، اقتصادی امور اور کشمیر کمیٹی میں تبدیلی کا امکان ہے جب کہ بعض وزرا کو ان کے عہدوں سے برطرف کرکے ان کی جگہ نئے چہرے شامل کیے جائیں گے۔

ذرائع کے مطابق خسرو بختیار اپنے موجودہ عہدے پر نہیں رہیں گے، شبلی فراز کو وزارت پیٹرولیم یا ایوی ایشن کی ذمہ داری دی جا سکتی ہے، رکن قومی اسمبلی فرخ حبیب کو وزیر مملکت بنایا جائے گا، سینیٹ انتخابات میں حکومتی امیدوار کے نام کے سامنے دستخط کرنے کی غلطی کرنے والے شہریار آفریدی سے کمیٹی کی چیئرمین شپ واپس لے کر فخر امام کو دوبارہ چیئرمین کشمیر کمیٹی لگائے جانے کا امکان ہے۔

وزیراعظم نے وزیر اطلاعات و نشریات کو دو الگ حصوں میں تقسیم کرنے کا اصولی فیصلہ کرلیا۔ وزیر اطلاعات و نشریات کے ساتھ ساتھ اطلاعات میں وزیر مملکت اور نشریات میں معاون خصوصی لگایا جانے کے آپشن پر بھی غور ہورہا ہے۔

وفاقی وزیر عمر ایوب سے توانائی اور پیٹرولیم کی وزارت واپس لیے جانے کا امکان ہے۔ وزیراعظم آج شام تک کابینہ میں تبدیلیوں کا اعلان کر سکتے ہیں۔