کراچیفائرنگ اور پر تشدد واقعات میں 2 افراد ہلاک 4 زخمی

ناظم آبادنمبر2 میں ڈکیتی،گھرکامالک گردن میں گولی لگنے سے زخمی، حالت تشویشناک ۔ فوٹو: فائل

---

مختلف علاقوں میں فائرنگ اور پر تشدد واقعات میں 2 افراد ہلاک اور4 زخمی ہو گئے ۔

سچل تھانے کی حدود عباس ٹاؤن بھکرگوٹھ کے قریب چیپل گارڈن والی گلی میں نامعلوم موٹرسائیکل سوارملزمان کی فائرنگ سے40 سالہ حبیب اﷲ محسود ولد سعد اﷲ محسود ہلاک ہوگیا اورملزمان موقع سے فرار ہوگئے،ایس ایچ اوسچل سید شوکت علی کے مطابق مقتول کی علاقے میں گاڑیوں کے ٹائروں کی دکان ہے،واقعے کے وقت وہ معمول کے مطابق پیدل اپنی دکان جارہا تھا کہ گھات لگائے دہشت گردوں نے اسے ٹارگٹ کیا مقتول کی خاندانی دشمنی تھی وہ بھکر گوٹھ کا رہائشی اور آبائی تعلق وزیرستان سے تھا،سائٹ بی کے علاقے بلدیہ نمبر9 میں واقع اے بی آئل کمپنی میں سے61سالہ حاجی گلزار ولد کالے خان کی لاش ملی، اسپتال ذرائع کے مطابق حاجی گلزار کے سر پر چوٹ کا نشان تھا جبکہ جسم پر بھی رگڑنے کے نشانات تھے۔



جبکہ ایس ایچ اوسہیل خان کا کہنا ہے کہ گلزار فیکٹری کے پروڈیکشن ڈیپارٹمنٹ میں ملازم تھا اور جمعرات کی صبح کمپنی آنے کے بعد کارڈ کے ذریعے حاضری لگانے کے بعد ڈیپارٹمنٹ جارہا تھا کہ اس پردل کا دورہ پڑگیا جوجان لیوا ثابت ہوا ، پولیس کے مطابق زمین پرگرنے سے سر پرچوٹ لگی، متوفی بلدیہ ٹائون کا رہائشی تھا، نامعلوم افراد کی فائرنگ سے پیرآباد تھانے کی حدود بنارس بخاری کالونی میں گھرکے باہر بیٹھا28 سالہ سلیم گل ولد دوست محمد زخمی ہوگیا جبکہ آرام باغ کے علاقے لائٹ ہاؤس( لنڈا بازار ) میں جھگڑے کے دوران چھری کے وار سے25سالہ شاہ ولی اﷲ ولد نصر اﷲ اورکورنگی کراسنگ پرلوٹ مار کے دوران مزاحمت کرنے پر 50سالہ محمد زاہد ولد سیف اﷲ زخمی ہوگیا۔ رضویہ کے علاقے ناظم آباد نمبر2 میں نامعلوم افراد نے گھر میں ڈکیتی کے دوران فائرنگ کرکے گھر کے مالک60سالہ شاہد عالم ولد عبد القیوم کوزخمی کر دیا اور ملزمان لوٹا ہوا سامان لے کرفرارہوگئے زخمی شاہد کوگردن میں گولی لگی اسے تشویشناک حالت میں عباسی شہید اسپتال پہنچایا گیا۔