علمِ نجوم کی روشنی میں آپ کا یہ ہفتہ

5 تا 11 اپریل 2021

---

برج حمل
سیارہ مریخ،21 مارچ تا20اپریل
آپ کا سیارہ مریخ سفر، رابطوں اور سوشل میڈیا کے خانے میں راہو کے ساتھ رہے گا۔ یہاں یہ ایک بھرپور توانائی کے ساتھ ہلچل مچائے رکھے گا۔ آپ اپنے بازوؤں میں ایک برق کوندتی محسوس کریں گے۔ اس ہفتے جو سیارے اس سے نظر بنائیں گے ان میں زہرہ جو کہ تعلقات، ازدواجی رشتے، شراکت اور آمدن کا ہے اور سورج جوکہ اعلٰی ذہانت اور تخلیقی صلاحیتوں سے تعلق رکھتا ہے اور مشتری سے جو کہ آپ کی خوش بختی کا سیارہ ہے۔ قمر ان سیاروں کو آپس میں مربوط کرنے کا کام دے گا۔ گویا ان امور سے فائدہ ہوسکتا ہے۔

برج ثور
سیارہ زہرہ،21اپریل تا 20 مئی
آپ کی فن کارانہ صلاحیتوں سے 6 تاریخ کا دن اہم ہوسکتا ہے، قمر راہو، زہرہ، عطارد اور شمس سے نظر بنائے گا، ایسے وقت میں آمدن میں کچھ گڑبڑ ہوتی ہے۔ آپ کی آمدن کا تعلق کسی ڈوبی رقم سے، بیرون ملک یا کسی قرض سے ہوسکتا ہے۔ اخراجات زیادہ نظر آرہے ہیں۔ گھر کے حوالے سے کوئی بات پریشان کرسکتی ہے۔ آپ کے وقار پر کوئی انگلی اٹھاسکتا ہے۔ بظاہر یہ مادی مشکلات آپ کو پریشان کریں گی لیکن یہی وقت آپ کو اندر سے مضبوط کرکے جائے گا۔

برج جوزا
سیارہ عطارد،21مئی تا 21 جون
یہ ہفتہ مکمل طور پر آپ کے لیے آسانیاں لاتا نظر آتا ہے۔ سیارے اپنی اچھی نظریں آپ کی جیب اور شخصیت پر ڈال رہے ہیں۔ خصوصاً مریخ، مشتری اور شمس مریخ آپ کی پرانی امیدوں کو بر لانے اور شمس آپ کے رابطوں سے اور مشتری آپ کو تعلقات سے خاطرخواہ فائدہ دلاسکتا ہے۔ آپ کے دوست آپ کے ساتھ مکمل طور پر تعاون کرکے آپ کو حیرت میں ڈال سکتے ہیں۔ 7 اور 11 تاریخیں اہم ترین ہوسکتی ہیں۔

برج سرطان
سیارہ قمر،22جون تا 23 جولائی
آپ کا سیارہ قمر اس ہفتے سیاروں سے نظر بنائے گا جو سیارے کشتی کو تیز تیراتے ہیں ڈبوتے ہیں اور پھر پار لگاتے ہیں۔ آپ کی ذہنی کیفیت ایک سی نہیں رہے گی۔ آپ کے کام کاج یعنی بزنس کو غیرمتوقع طور پر مسائل گھیرسکتے ہیں، لیکن آپ کی اعلٰی قائدانہ صلاحیتں ان مسائل پر قابو پالیں گی۔ 11 تاریخ کو آپ کو اہم مالی فائدہ ہوسکتا ہے۔ کچھ پرانے کیس یا چیک یا کسی سے کیا گیا وعدہ نبھانے میں مشکل ہوسکتی ہے۔ اپنے امور میں محتاط رہیں۔

برج اسد
سیارہ شمس،24جولائی تا 23 اگست
شمس شرفی مقام سے گزرے گا اور ایسے وقت میں وہ آپ تخلیقی صلاحیتوں کے سیارے سے نظر بنارہا ہوگا۔ ایسے وقت میں آپ کے دوست آپ کے بزرگ اور بزرگ دوست بن کے آپ کا ساتھ دیں گے۔ لگتا ہے اس ہفتے آپ کوئی لمبے عرصے کا کوئی منصوبہ شروع کررہے ہیں جو کہ آپ کے مالی امور میں کافی حد تک سود مند ثابت ہوسکتا ہے۔ والدہ کی صحت کا خیال رکھیں۔ آپ کا اپنا معدہ بھی متاثر ہوسکتا ہے۔

برج سنبلہ
سیارہ عطارد،24 اگست تا 23 ستمبر
آپ کی صحت کے کچھ مسائل سر اٹھا سکتے ہیں۔ خصوصاً معدہ اور نظام انہضام سے تعلق رکھنے والا حصہ مناسب علاج کی ضرورت پیش آسکتی ہے۔ شمس جو کہ چھپے امور سے تعلق رکھتا ہے آمدن کے سیارے کو اپنی روشنی دے گا۔ اس ہفتے غیرمتوقع طور پر آمدن میں اضافہ ہوسکتا ہے اور ذرا سی بے پرواہی سے یہ پیسہ ضائع بھی ہوسکتا ہے۔ شریکِ حیات سے کچھ ان بن ہوسکتی ہے۔

برج میزان
سیارہ زہرہ،24 ستمبر تا 23اکتوبر
گھر اور آمدن سے متعلق کچھ پریشانی ہوگی لیکن وہیں پر حل بھی موجود ہوگا۔ آپ کا سیارہ ایسے جگہ موجود ہے کہ جہاں سے آپ کو آپ کی پبلک لائف اور عوامی روابط سے فائدہ دلائے گا۔ پرانا دوست یا بڑا بھائی جس کا حکومتی اداروں میں کام ہے آپ کی مدد کرے گا۔ آپ کے کسی دوست یا بھائی کا پروموشن بھی ہوسکتا ہے اور اسے اعلٰی انتظامی ذمہ داریاں بھی سونپی جاسکتی ہیں۔

برج عقرب
سیارہ پلوٹو،24 اکتوبر تا 22 نومبر
روزمرہ کی مصروفیات کو آپ کا ساتھی نہیں سمجھ پارہا اور یہی وجہ آپ کے درمیان اختلاف کی ہوسکتی ہے۔ اگرچہ یہ ایک مشکل وقت ہے لیکن امید ہے آپ اسے گزارہی لیں گے اور مسائل کا حل نکل ہی آئے گا۔ کوشش کیجیے کہ منفی سوچوں سے اپنے ذہن کو محفوظ رکھ سکیں۔ ورنہ کوئی نفسیاتی بیماری پنپ جائے گی اور آپ کی زیادہ غور وفکر کی وجہ سے آپ کے لیے مسائل کھڑے ہوجائیں گے۔

برج قوس
سیارہ مشتری،23 نومبرتا 22 دسمبر
آپ کی ذہانت اور اعلٰی سوچ کے نئے دروازے کھلیں گے اور یوں محسوس ہوگا گویا غیب سے آپ کو خیالات آرہے ہیں اور آپ خود کو ہلکا پھلکا محسوس کریں گے۔ مشکل سے مشکل مسائل کا پلک جھپکتے میں حل نکل آئے گا۔ سفر اور رابطوں کے خانے میں موجود آپ کا سیارہ مشتری دوسروں پر خاص اثر ڈالے گا۔ آپ کی شخصیت میں سنجیدگی اور بردباری کا بھی عکس ابھر آئے گا۔ 7 اور 11 تاریخیں آپ کو کئی خوشیاں دے جائیں گی۔

برج جدی
سیارہ زحل،23 دسمبر تا 20 جنوری
آپ کا سیارہ اثاثہ بنانے کی فکر میں نظر آتا ہے۔ یہیں پر مشتری اسے اپنی حمایت دے رہا ہے۔ شمس اور مریخ کچھ مشکل کے بعد آپ کو پرانے وراثتی جائداد سے فائدہ دلاتے نظر آتے ہیں۔ عطارد مسائل لاسکتا ہے اس کی وجہ وراثتی تقسیم یا پرانا کوئی کاغذی مسئلہ ہوسکتا ہے، کوئی مقدمہ یا وصیت ہوسکتی ہے۔ کوشش کیجیے کہ بڑے بھائی بہن سے تلخی سے گریز ہی کریں۔

برج دلو
سیارہ یورنیس،21 جنوری تا 19 فروری
یہ ہفتہ آپ کے لیے اچھا ہے اور قریبی لوگوں سے آپ کے دیرینہ معاملات ذرا سی مشکل کے بعد حل پاتے ہوئے نظر آتے ہیں۔ آپ کو دوستوں اور بہن بھائیوں کا تعاون حاصل رہے گا اور گذشتہ سالوں کی نسبت اب آپ کی شخصیت میں برداشت اور دوراندیشی کافی بہتر ہونے کی وجہ سے آپ کے اردگرد رہنے والے لوگ آپ کی بات کو اہمیت بھی دیتے ہیں اور اب آپ مسائل کو حل کرنے کی بہتر صلاحیت سے مالامال بھی ہیں۔

برج حوت
سیارہ نیپچون،20 فروری تا 20 مارچ
7 اور 11 تاریخوں کو مالی لحاظ سے کوئی اچھی خبر مل سکتی ہے۔ یہ آپ کا اچھا وقت ہوسکتا ہے اور کچھ حیرت میں ڈالنے والا بھی ہوسکتا ہے، کیوںکہ کچھ سیارے توقع کے برعکس آپ کو مالی فائدہ دے سکتے ہیں اور ممکن ہے کہ آپ کہیں ایسی جگہ انویسٹ کریں جہاں دوسروں کا دھیان نہ ہو یا آپ کسی خفیہ بزنس میں بھی ہاتھ ڈال سکتے ہیں۔ کوشش کیجیے کہ غیرقانونی راستوں سے دور رہیں۔