ڈاکو کی 3 گھنٹے تک نارتھ ناظم آباد سمن آباد گلبرگ میں لوٹ مار

گلبرگ میں حاجی کلب کے قریب ڈاکو شہری کو لوٹ رہاتھا،گشت پر مامور پولیس موبائل آگئی، ڈاکونے فائر نگ کردی۔

Staff Reporter April 08, 2021

پولیس کی جوابی فائرنگ سیڈاکو زخمی،پولیس نے گرفتار کرلیا، موٹر سائیکل ، اسلحہ ، نقدی ، موبائل فون اور دیگر اشیا برآمد۔ فوٹو: فائل

گلبرگ میں پولیس مقابلے کے دوران 3گھنٹے سے مختلف علاقوں میں وارداتیں کرنے والے ڈاکو کو زخمی حالت میں گرفتار کرلیا گیا۔

منگل اور بدھ کی درمیانی شب گلبرگ کے علاقے بلاک13 میں حاجی کلب کے قریب ایک ڈاکو شہریوں سے لوٹ مار کررہا تھا کہ اس دوران گشت پر مامور پولیس موبائل موقع پر پہنچ گئی جسے دیکھتے ہی ڈاکو نے فائرنگ کی اور فرار ہونے کی کوشش کی،پولیس کی جوابی فائرنگ سے ڈاکو زخمی ہوگیا، پولیس نے فوری طور پرڈاکو کو حراست میں لے کر طبی امداد کیلیے عباسی شہید اسپتال منتقل کیا جہاں وہ بے ہوشی کی حالت میں زیر علاج ہے۔

پولیس حکام کے مطابق ڈاکو نے تین گھنٹے قبل نارتھ ناظم آباد کے علاقے سے چھینی تھی اور اس کے بعد اس نے سمن آباد میں شہریوں سے موبائل فون چھینے ،ملزم اس کے بعد گلبرگ کے علاقے میں واردات کررہا تھا کہ پولیس نے اسے دھر لیا، ملزم کے قبضے سے موٹر سائیکل، اسلحہ، نقدی، موبائل فون اور دیگر اشیا برآمد کرلیں ، ملزم کے خلاف مزید تحقیقات جاری ہے۔