امریکا سب سے زیادہ امداد پختونخوا کو دے رہا ہے امریکی سفیر

پسماندگی کے خاتمے کیلیے کرداراداکررہے ہیں،اولسن،امریکا میگا ہائیڈل پروجیکٹ دے،شنواری۔ فوٹو: فائل

---

پاکستان میں امریکی سفیر رچرڈ اولسن اور خیبر پختونخوا چیمبر آف کامرس اینڈ انڈسٹری کے صدر زاہداللہ شنواری کے درمیان امریکی امداد سے صوبے میں ہونے والے ترقیاتی کاموں میں نجی شعبے کی شمولیت اور روابط کے فروغ پراتفاق ہوا ہے اور خیبر پختونخوا چیمبر کے صدرزاہداللہ شنواری نے امریکی سفیر پر زور دیا ہے کہ وہ صوبہ خیبر پختونخوا میں انڈسٹریلائزیشن کے فروغ سمیت300 سے400 میگاواٹ تک ایک بڑا ہائیڈرل پاورپروجیکٹ قائم کرے جس سے صوبے میں بڑی تعداد میںنئی صنعتی بستیاں قائم ہوں گی اور2 لاکھ سے زائد افرادکوروزگارکے مواقع میسرآئیںگے۔

خیبرپختونخوا چیمبر کے صدر زاہداللہ شنواری کی سربراہی میں سینئرنائب صدرمحمد شفیق نے پشاور میں امریکی سفیر رچرڈ اولسن سے ملاقات کی۔ امریکی سفیر نے کہا کہ امریکا سب سے زیادہ امداد خیبر پختونخوا کو دے رہا ہے، صوبے کی پسماندگی کے خاتمے کیلیے کرداراداکررہے ہیں۔



زاہداللہ شنواری نے امریکی حکومت کی جانب سے پاکستان کو دی جانے والی امداد پران کا شکریہ ادا کیا تاہم انھوں نے کہا کہ امریکا کے صوبہ خیبرپختونخوا کے پروجیکٹس میں پرائیویٹ سیکٹر کی شمولیت نہ ہونے کی وجہ سے عوام کوامریکی امداد کا علم نہیں ہو رہا اور نہ ہی اس صوبے کی پسماندگی دور ہوئی ہے۔ انھوں نے امریکی سفیر سے کہا کہ وہ پشاور میں جدید ایئرپورٹ کے قیام کے لیے امداد دے۔