پاکستان میں پہلی بار مصنوعی طریقہ افزائش سے اونٹ کے بچے کی پیدائش

سیکرٹری لائیو اسٹاک نے ماہرین کو مبارکباد پیش کی، فوٹو: ایکسپریس نیوز

---

ملک میں پہلی بار مصنوعی طریقہ افزائش سے اونٹ کے بچے کی پیدائش ہوئی ہے جس کے لیے یونیورسٹی آف ویٹرنری اینڈ اینیمل سائنسز کے ڈاکٹرز اور محکمہ لائیو اسٹاک کے کیمل بریڈنگ ماہرین نے مشترکہ طور پر کام کیا تھا۔

ایکسپریس نیوز کے مطابق لاہور میں مڑیچہ نسل کے اونٹ سے مصنوعی طریقہ افزائش کے ذریعے سے مادہ بچھڑے کی پیدائش کا کامیاب تجربہ کیا گیا ہے۔ یہ ملکی تاریخ میں مصنوعی طریقے سے کسی جانور کی پیدائش کا پہلا واقعہ ہے۔

اس اہم کامیابی کو لائیو اسٹاک کے ماہرین نے سیمن کولیکشن، مصنوعی طریقہ افزائش اور الٹراساؤنڈ جیسے جدید طریقوں سے حاصل کیا ہے۔ اونٹ کا نوزائیدہ بچہ صحت مند بتایا جا رہا ہے۔

ماہرین کا دعویٰ ہے کہ اس طریقہ سے ایسی مادہ اونٹ جو کسی بیماری یا معذوری کی وجہ سے قدرتی طریقے سے بچے کی پیدائش نہیں کرسکتی تھیں ان سے بھی بچے حاصل کئے جاسکیں گے۔

اس موقع پر سیکرٹری لائیو اسٹاک کیپٹن ریٹائرڈ ثاقب ظفر نے ماہرین کو کامیاب تجربے پر مبارکباد دیتے ہوئے کہا کہ اونٹ کا دودھ اور گوشت طبی لحاظ سے بہت فائدہ مند ہوتا ہے۔