فنکاروں کی مصروفیت بڑھ گئی معیار نہیں رہا اسماعیل تارا

حکومت کی ذمے داری ہے کہ وہ عام آدمی کو ریلیف دینے کے لیے فی الفور اقدامات کرے۔ فوٹو: افئل

---

اداکار اسماعیل تارا نے کہا ہے کہ ملک میں گھنٹوں کے حساب سے بڑھنے والی مہنگائی نے مڈل کلاس اور غریب طبقے کو زندہ درگور کر دیا ہے۔

انھوں نے ایکسپریس سے گفتگو میں کہا کہ مڈل کلاس طبقہ کے لیے موجودہ حالات میں کچن چلانے کے ساتھ بچوں کی تعلیم اور دوسرے اخراجات پورا کرنا مشکل ہو گیا ہے، آسمان سے باتیں کرتی ہوئی مہنگائی کے ساتھ یوٹیلٹی بلوں نے عوام کا بھرکس نکال دیا ہے، وہ ہر نئی آنیوالی حکومت سے اچھے کی امید لگاتے ہیں مگر ہر بار ان کے ساتھ دھوکہ ہو رہا ہے، اب تو یہ صورتحال ہے کہ صبح جو چیز لیتے ہیں شام کو اسی کی قیمت بڑھ چکی ہوتی ہے۔



حکومت کی ذمے داری ہے کہ وہ عام آدمی کو ریلیف دینے کے لیے فی الفور اقدامات کرے، بجلی ، گیس بلوں کے ساتھ روزمرہ اشیاء کی روزانہ کی بنیاد پر بڑھنے والی قیمتوں کو روکا جائے۔ ایک سوال کے جواب میں اسماعیل تارا نے کہا کہ ٹی وی پروڈکشن بڑھنے سے فنکاروں کی مصروفیت میں اضافہ ضرور ہوا ہے مگر اگر معیار کی بات کریں تو اسے مسلسل نظرانداز کیا جا رہا ہے۔