منفی سیاست عمران خان کا وتیرہ بن گیا رانا ثنا اللہ

وزیر قانون پنجاب رانا ثنا اللہ نے اس بات پر افسوس کا اظہار کیا کہ چیئرمین پی ٹی آئی عمران خان نے اپنے کارکن کی موت کو بھی سیاسی پوائنٹ اسکورنگ کیلیے استعمال کیا ہے، حقائق سامنے آنے پر ہو سکتا ہے عمران کو اپنے کہے پر پشیمانی کا سامنا کرنا پڑے۔

انھوں نے کہا کہ تنقید سے پہلے عمران خان خیبرپختونخوا میں اپنی کارکردگی پر ضرور نظر ڈال لیا کریں، میرٹ حکومت پنجاب کا وتیرہ امتیاز ہے، عمران میں نہ مانوں کی پالیسی چھوڑ دیں۔




صوبائی وزیر قانون نے اپنے ردعمل میں کہا کہ سیاست میں منفی وتیرہ عمران خان کی سیاست کا محور بن گیا ہے اور وہ ہر مسئلے پر بلا سوچے سمجھے طبع آزمائی کرتے رہتے ہیں۔ انھوں نے کہا کہ انکے تبدیلی کے نعرے اب مذاق بن کر رہ گئے ہیں، عوام پر انکی اصلیت عیاں ہو چکی ہے، لاہور کی فلاپ ریلی اسکی ایک مثال ہے جس میں عوام نے شرکت نہ کر کے ان کی پالیسیوں کو مسترد کر دیاہے۔