وزیراعظم عمران خان کا  کورونا سے متاثرہ بھارتی عوام سے اظہار ہمدردی

بھارت سمیت دنیا بھر میں کورونا متاثرین کی صحت یابی کے لئے دعاگو ہوں، عمران خان۔

---

وزیراعظم عمران خان نے کورونا سے متاثرہ بھارتی عوام سے ہمدردی کا اظہار کیا ہے۔

سماجی رابطے کی ویب سائٹ ٹویٹر پر اپنی ٹویٹ میں وزیراعظم عمران خان نے بھارتی عوام سے ہمدردی کا اظہار کرتے ہوئے کہا ہے کہ بھارتی شہری کورونا کی خطرناک لہر سے نمٹ رہے ہیں، بھارت سمیت دنیا بھر میں کورونا متاثرین کی صحت یابی کے لئے دعاگو ہوں۔

I want to express our solidarity with the people of India as they battle a dangerous wave of COVID-19. Our prayers for a speedy recovery go to all those suffering from the pandemic in our neighbourhood & the world. We must fight this global challenge confronting humanity together

— Imran Khan (@ImranKhanPTI) April 24, 2021

ایدھی فاؤنڈیشن کی جانب سے بھارت کو امداد کی پیش کش

گزشتہ روز ایدھی فاؤنڈیشن کے سربراہ فیصل ایدھی نے بھی بھارتی وزیراعظم نریندرمودی کو خط لکھا کر بھارت میں کورونا کے بڑھتے کیسز اور اموات پر دکھ کا اظہار کیا تھا اور کہا تھا کہ ہم کورونا وائرس کے ان حالات میں انسانیت کے ناطے بھارتی عوام کی مدد کرنا چاہتے ہیں۔ فیصل ایدھی نے بھارتی وزیراعظم کو کورونا وائرس کے مریضوں کی نقل و حرکت کے لئے 50 ایمبولینسز فراہم کرنے کی بھی پیش کش کی ہے۔

واضح رہے کہ بھارت اس وقت کورونا وبا کے باعث بدترین صورتحال میں ہے، روزانہ کی بنیاد پر لاکھوں کی تعداد میں کورونا کے نئے مریض سامنے آرہے ہیں، کئی ریاستوں میں اسپتالوں میں کورونا متاثرین کے لیے جگہ نہیں جب کہ کئی اسپتالوں میں آکسیجن کی کمی سے مریض جان کی بازی ہار رہے ہیں۔