فیفا نے کرسچیانو رونالڈو کو 2013 کا بہترین فٹ بالر قرار دے دیا

فٹ بال کی عالمی تنظیم فیفا نے پرتگال کے کرسچیانو رونالڈو کو سال کا بہترین کھلاڑی قرار دیتے ہوئے انھیں بیلن ڈی اور ایوارڈ سے نوازا ہے۔

سوئٹزرلینڈ کے شہر زیورخ میں منعقدہ تقریب میں کرسچیانو رونالڈو کو سال کے بہترین فٹ بالر کے اعزاز سے نوازا گیا، اس اعزاز کے حصول کے لئے ان کا مقابلہ ارجنٹائن کے لیوئنل میسی اور فرانسیسی کھلاڑی فرینک ریبری سے تھا تاہم 2013 میں شاندار کارکردگی دکھانے پر انتخاب فیفا کے ارکان کی فٹبال ٹیموں کے کپتانوں، کوچ اور صحافیوں پر مشتمل کمیٹی نے رونالڈو کو اس ایوارڈ کا مستحق قرار دیا۔ کرسچیانو رونالڈو نے 2013 کے دوران اپنے ملک اور کلب کی جانب سے 56 میچوں میں حصہ لیا اور اس دوران انھوں نے 66 گول کئے تھے۔

تقریب میں فیفا پرو ورلڈ XI ٹیم سمیت سات ایوارڈز کا بھی اعلان کیا گیا جس کے تحت جرمنی کی خاتون گول کیپر ندین اینگرر کو بہترین خاتون کھلاڑی،جرمنی ہی کے کلب بائرن میونخ کے سابق کوچ جُپ ہینکس کو سال کا بہترین کوچ جبکہ سویڈن کے ابراہمووچ کے گول کو سال کا بہترین گول قرار دیا گیا اس کے علاوہ جبکہ فیئر پلے ایوارڈ افغانستان کو دیا گیا۔ تقریب میں لیجنڈ فٹبالر پیلے کو بھی اعزازی بیلن ڈی اور ایوارڈ سے نوازا گیا۔