ٹیکسی ڈرائیور کے قتل کا مقدمہ منتقل کرنیکی درخواست مسترد

عدالت نے آج ملزم کو فرد جرم عائد کرنے کیلیے طلب کرلیا ہے۔ فوٹو: فائل

---

انسداد دہشت گردی کی خصوصی عدالت نے زیر سماعت ٹیکسی ڈرائیور قتل کیس کو ماتحت عدالت میں منتقل کرنے سے متعلق وکیل صفائی کی درخواست مسترد کردی۔

بدھ کو انسداد دہشت گردی کی خصوصی عدالت نے ٹیکسی ڈرائیور مراد عباس قتل کیس کو سیشن عدالت میں منتقل کرنے سے متعلق ملزم رینجرز اہلکار غلام رسول کے وکیل کی درخواست مسترد کردی ہے اور آج ملزم کو فرد جرم عائد کرنے کیلیے طلب کرلیا ہے۔



دریں اثنا انسداد دہشت گردی کی خصوصی عدالت نے ملزم اسامہ حبیب کو تحفظ پاکستان ایکٹ کے تحت تفتیش کیلیے90 روز کی نظربندی پر رینجرزکے حوالے کردیا،ملزم اسامہ حبیب کو رینجرز حکام نے گارڈن سے گرفتار کیا تھا ملزم کا تعلق سیاسی جماعت سے ہے اور ملزم قتل ،اقدام قتل اور دہشت گردی کی وارداتوں میں ملوث ہے، علاوہ ازیں انسداد دہشت گردی کی خصوصی عدالت نے کالعدم تحریک طالبان کے مقامی کمانڈر محمد ہاشم کو 14دن کے جسمانی ریمانڈ پر پولیس کی تحویل میں دیدیا۔